Соёл, спорт, аялал жуулчлалын яамны Соёл, урлагийн бодлогын хэрэгжилтийг зохицуулах газрын дарга Н.Оргилтой холбоотой асуудал сүүлийн үед олны анхааралд байгаа. Тэгвэл Соёл, спорт, аялал жуулчлалын яамнаас Н.Оргилын оронд тоонд томилогдох хүнийг сонгохоор энэ долоо хоногт сонгон шалгаруулалт хийжээ. Эх сурвалжийн мэдээлж буйгаар тус орон тооны сонгон шалгаруулалтаар З.Баянзул хамгийн өндөр оноо авсан гэнэ.
Тодруулбал, Соёл, урлагийн бодлогын хэрэгжилтийг зохицуулах газрын даргын орон тоонд Б.Баяраа, З.Баянзул, Б.Болормаа, О.Гэрэлсүх, Н.Оргил, Г.Эрдэнэбаатар, Л.Эрдэнэчимэг нарын 7 иргэн өрсөлджээ. Тэднээс З.Баянзул, Б.Баяраа нар онлайн системээр явуулдаг сорилын шалгалтаар тэнцэж, дараагийн шалгалтад орох болзлыг хангасан гэнэ.
Тиймээс Төрийн албаны зөвлөлийн өчигдрийн ээлжит хуралдаанаар дээрх сонгон шалгаруулалтын дүнг хэлэлцээд шалгалтад тэнцэж хамгийн өндөр оноо авсан З.Баянзулыг Соёл, спорт, аялал жуулчлалын яамны Соёл, урлагийн бодлогын хэрэгжилтийг зохицуулах газрын даргаар томилуулахаар дүгнэлт гарган, нэр дэвшүүлж санал хүргүүлэхээр шийдвэрлэжээ.
Сонирхуулахад, З.Баянзул нь Соёл, урлагийн бодлогын хэрэгжилтийг зохицуулах газарт мэргэжилтнээр ажилладаг бөгөөд “Тусгай салаа” олон ангит киноны Сүлдийн аав Даваагийн дүрд тоглож байсан юм.
Б.Одон