Сирийн Засгийн газар болон сөргөлдөгч талуудын хэлэлцээрийн хоёрдугаар шат эхэлжээ. Эхний өдрийн хуралдаан хаалттай болж өнгөрсөн тухай “ВВС” агентлаг мэдээлсэн байна.  Энхийн хэлэлцээрийн нэгдүгээр шатанд босогчдын талд эзлэгдсэн “Хомс” хотоос эмэгтэйчүүд, хүүхдүүдийг нүүлгэн шилжүүлэхээр тохиролцож, 600 гаруй хүнийг аюулын бүсээс гаргасан юм. Мөн босогчид болон Засгийн газар хооронд түр гал зогсоох гэрээ байгуулсан нь хэлэлцээр амжилттай явж буйг харуулсан билээ. Тиймээс хэлэлцээрийн хоёрдугаар шат үр дүн авчирна гэж ажиглагчид үзэж байгаа юм.

Эх сурвалжийн мэдээлж буйгаар, терроризм, хүчирхийллийг таслан зогсоох тухай асуудлаар хэлэлцсэн боловч үзэл бодлын зөрчилдөөн гарсан хэвээр байгаа аж. Гурван жилийн турш үргэлжилсэн иргэний дайныг зогсоохын тулд хоёр тал анх удаа Женев хотноо хэлэлцээрийн ширээний ард суусан ч хурал өнөөдрийг хүртэл үл хүндэтгэсэн байдалтай үргэлжилж байгаа аж.

Б.Дэлгэрцэцэг