АНУ, Өмнөд Солонгосын цэргийн хамтарсан хээрийн сургалт албан ёсоор эхэллээ. “Yonhapnews.co.kr” агентлагийн мэдээлж буйгаар “Хойд Солонгосын Батлан хамгаалах яам, хоёр орны хамтарсан сургуулилтыг өдөөн хатгалга гэж үзэж, байлдааны бэлэн байдалд шилжсэн” гэжээ. Энэ тухай Өмнөд Солонгосын Ерөнхийлөгч, ерөнхий командлагч Пак Ын Хэ мэдэгджээ. Тэрбээр “АНУ болон Өмнөд Солонгос хоёр орон хамтарсан хээрийн сургуулилтаа төлөвлөсөн хугацаанаас нэг хоногийн алдагдалтай эхлүүллээ. Нэг хоног алдсан учир хоёр Солонгосын дайны үед салсан гэр бүлүүдийг уулзуулах ажиллагаа өндөрлөх хүртэл хойшлуулах шийдвэрийг гаргасан. Хойд Солонгосоос ямар ч дарамт ирсэн энэхүү цэргийн сургуулилтыг цуцлахгүй гэдгээ мэдэгдэж байна” гэжээ.
“KeyResolve and FoalEagle” нэртэй хээрийн сургалт ирэх дөрөвдүгээр сарын 18-ны өдөр хүртэл үргэлжлэх юм. “KeyResolve”-ийн сургалт компьютерийн загварчлалаас бүрэлдэх бол “FoalEagle” хээрийн сургалтад Нисэх хүчин, Тэнгисийн цэрэг ба хуурай замын цэргийнхэн оролцох аж. АНУ-ын Батлан хамгаалах яамнаас “Хоёр орны хамтарсан цэргийн сургуулилтад 12700 цэргийн албан хаагч оролцож байгаа” гэж мэдээлсэн байна. Өнгөрсөн жил хоёр улсын хээрийн сургуулилтыг цуцлахын тулд Хойд Солонгосын талаас пуужин туршина хэмээн сүрдүүлж байсан удаатай юм.
Б.Дэлгэрцэцэг