Хойд Солонгосын зүүн эрэг орчмоос ойрын тусгалтай 25 пуужин харвасан тухай “yonhapnews.co.kr” мэдээллээ. Өчигдөр орон нутгийн цагаар өглөөний 6.20 цагт эхний 10 пуужинг 10 минутын зайтай харвасан бол дараагийн найман пуужинг 8.30 цагт тус бүрийг таван минутын зайтай харважээ. Харин дараагийн долоон пуужинг 9.28 цагаас дөрвөн минутын зайтай харваж Хойд Солонгос сүр хүчээ үзүүлжээ. Тус улсын зүүн эргийн Вонсаны районоос харвасан ойрын тусгалтай энэхүү пуужинууд 70 км-ийн радиуст тусдаг болохоор бүгд зүүн эрэг орчмын тэнгисийн усанд унасан тухай Өмнөд Солонгосын батлан хамгаалах яамнаас мэдэгдэв.
Энэ сард Хойд Солонгос хоёр ч удаа пуужин харвасныг АНУ, Өмнөд Солонгос, олон улсын хамтын нийгэмлэгүүд буруутгажээ. Хойд Солонгосын удирдлагууд дээрх үйлдлээ Өмнөд Солонгос, АНУ хоёр улсын цэргийн хамтарсан сургуулилтын эсрэг хийж байгаа хариу үйлдэл гэж тайлбарласан байна.
Б.Дэлгэрцэцэг
Уншиж байна |