Украины шинэ Засгийн газар Крымээс иргэд болон цэргүүдээ гаргахаар шийдвэрлэсэн талаар Киев хотын аюулгүйн албаны дарга Андрей Парубый “ВВС” агентлагт мэдээлэв.
Өчигдөр оросын талыг дэмжигчид тус улсын цэргийн баазыг эзэлсэний дараа Крымийг Оросын газар нутаг хэмээн Украины цэргүүдийг гаргахыг шаардаж, эсэргүүцлийн жагсаал зохион байгуулсан юм.
Андрей Парубый ОХУ-ын Ерөнхийлөгчийн шахалтаар арга буюу цэргээ гаргахаар болж, ирэх аравдугаар сар гэхэд ихэнх иргэнээ татахаар болсон гэжээ.
Тэрбээр, “Украинчууд Крымээс цэргээ татахгүй бол хүч хэрэглэх нь гарцаагүй байсан. Крым Оросын нутаг дэвсгэр болсон нь тэнд амьдарч буй Украин иргэдийн аюулгүй байдалд заналхийлж байгаа тул барууны орнуудын дэмжлэг авч, энэ хүчирхийлэлийн хариуг заавал өгөхөө амлаж байна. Украин тусгаар тогтносон улс. Тэгэхдээ ОХУ-аас хараат хэвээр байгаа учир европын хамгийн хүчирхэг гүрнүүд болох АНУ, Их Британитай хамтран цэргийн сургуулилт хийх болно” гэжээ.
Өнгөрсөн 18-ны өдөр Крым Оросын бүрэлдэхүүнд орсоны дараа цэргийн баазад өрнөсөн мөргөлдөөний үеэр Украины нэг офицер амиа алдаж, хэд хэдэн цэрэг шархадсаны улмаас, тус улсын арми онц байдал зарлаад буй. Маргааш НҮБ-ын Ерөнхий нарийн бичгийн дарга Бан Ги Мүн Крымд айлчлахаар болжээ.
Б.Дэлгэрцэцэг
Уншиж байна |