Австралийн Далайн аюулгүй байдлын удирдлагын газар хиймэл дагуулаас Малайзын “Boeing 777-200” онгоцны хэлтэрхий байж болох хоёр биетийн зургийг олон нийтэд танилцуулав. Энэхүү зурагт Перт хотоос баруун зүгт Энэтхэгийн далайд нэг нь 24 метр орчим, нөгөө хэсэг нь таван метрийн хэмжээтэй хоёр объектын дүрс буужээ. Австрали улс өчигдрөөс эхлэн эрлийн ажилд оролцохоо мэдэгдэж, дөрвөн аврах онгоц эрэл хайгуулын ажилд оролцуулаад буй.

1

Тус улсын Ерөнхий сайд Тони Абботт дээрх хоёр зүйлийг онгоцны хэлтэрхий гэж батлаагүй гэдгийг онцолжээ. Мөн АНУ, Шинэ Зеланд улс далайн тэр хэсэг рүү онгоц илгээжээ. Харин цаг агаар муудсаны улмаас харагдах орчин хязгаарлагдаж, эрэл хийхэд хүндрэл учруулж байгаа гэжээ. Онгоцнуудаас гадна Австрали, Их Британийн тэнгисийн хүчний хөлөг онгоц эрэлд оролцохоор далайд гарчээ. Малайзын Тээврийн сайдын үүрэг гүйцэтгэгч Хисхаммуддин Хуссейн “Хэрвээ тэр зүйлс онгоцны хэлтэрхий мөн бол сүүл хэсгийнх байж магадгүй” гэжээ. Сураггүй алга болсон онгоцыг 14 дахь хоногтоо хайж байгаа бөгөөд янз бүрийн таамаг дэвшүүлсээр байгаа юм. Эрлийн багууд эрэл хийх хэмжээг нэмэгдүүлсэн хэдий ч үр дүн гарахгүй байгаа билээ.

1

Б.Дэлгэрцэцэг