Украины нийслэл Киев хотноо өнгөрсөн оны арваннэгдүгээр сараас эхэлсэн эсэргүүцлийн жагсаал өнөөг хүртэл үргэлжилсээр байна. Таван сар хэртэй үргэлжилсэн жагсаал, мөргөлдөөний улмаас 100 гаруй иргэн амиа алдсан юм. Тус улсын шүүх эмнэлгээс мэдэгдэхдээ “Амиа алдсан ихэнх иргэн жагсагчдын тавьсан тэнсэн суманд өртсөн” хэмээжээ. Энэ бол бодитой мэдээлэл юм. Жагсагчид өнгөрсөн нэгдүгээр сараас цагдаа хүчний байгууллагын өмнөөс галт зэвсэг хэрэглэж, улмаар 20 цагдаа амиа алдсан билээ.
Эмх замбараагүй байдлын улмаас Оросын арми Крымд нэвтэрч хүрээгээ тэлсээр Украины хил орчимд байрлаж, тушаал хүлээсээр байгаа юм. Өчигдөр “НАТО”-ийн Европын холбоотнуудын дээд коммандлалын Генерал Филип Бридлав “Associated Press” агентлагт ярилцлага өгөх үеэрээ “Орос Украиныг хормын төдийд л эзлэх болно. Бидний тооцоолсоноор 12-13 цагийн дотор. Оросын арми дэндүү хүчирхэг. Энэ цагийг хойшлуулж чадах ганц улс бол АНУ. Тэгэхдээ Ерөнхийлөгч Барак Обама Украинд цэргийн тусламж өгөх асуудалд нухацтай хандаж байгаа. Украины Засгийн газар энэ бүх аюулыг урьдчилан тооцоолж байгаа учир АНУ-тай хамтрахыг илүүд үзэж буй” гэж ярьжээ. Мөн тэрбээр “НАТО”-ийн тусгай тасгийн мэдээлсэнээр Оросын арми Украины хилийн ойролцоо 40 мянга гаруй цэрэг төвлөрүүлсэн нь Кремлийн Киевийн эсрэг зэхэж буй болзошгүй байдал гэж ажиглагдаж байгаа. Өмнө нь ОХУ-ын Батлан хамгаалах яам “НАТО”-д мэдэгдсэнээр, 10 мянган цэрэг Украины хил орчимд байрласан хэмээн буруу мэдээлэл дамжуулсан” хэмээжээ.
Б.Дэлгэрцэцэг