Хошуу тамгын хавсраа бичээчээс эхлэн элчин сайд, Төрийн тэргүүн хүртэл улсынхаа Төр засагт тасралтгүй 50 жил зүтгэж, ард түмэндээ “жинхэнэ Төрийн хүн” хэмээн хүндлэгдсэн Жамсрангийн Самбуугийн тухай өгүүлсэн “Монгол Төрийн мэргэн өвөө” номын нээлт өчигдөр боллоо.
Ж.Самбуугийн тухай аман түүх яриа, баримтат ярилцлагаас бүтсэн энэ номыг Хууль зүйн ухааны доктор хуульч, сэтгүүлч Ш.Сүхбаатар бичиж, туурвижээ. Тэрбээр “Энэ номонд Ж.Самбуугийн тухай аман түүх яриа, түүний Төрийн хэргийг хэрхэн шийддэг байсан тухай түүхэн баримттайгаар өгүүлсэн. 30 жилийн турш 400 орчим хүнтэй уулзан, судалгаа хийж, цуглуулсан баримтаас бүтсэн. Түүний амьдрал бол санаж сэрэхийн ухаарал юм гэдгийг харуулсан. Ард түмэн Ж.Самбуу гуайг төрийн мэргэн өвөө гэж хэлдэг хэлдэг учир номондоо ийм нэр хайрласан. 10 жилийн өмнө бичсэн номондоо уг нэрийг өгч байсан” гэж ярьсан.
“Монгол Төрийн мэргэн өвөө” номын нээлтэд анхны Ерөнхийлөгч П.Очирбат, Ерөнхий сайд Д.Содном, “Тунгалаг тамир”-ын Итгэлт баян АЖ А.Очирбат, Ардын уран зохиолч П.Бадарч зэрэг эрхмүүд хүрэлцэн ирж номын баатрын тухай дурсамж задалж, шинэ номын тухай санал сэтгэгдлээ илэрхийлсэн.
Б.Буд
Уншиж байна |