УИХ дахь МАХН, МҮАН-ын “Шударга ёс” эвслийн бүлгийн хуралдаан өндөрлөлөө. Хуралдаанаар эдийн засгийг идэвхжүүлэх чиглэлээр Засгийн газарт чиглэл өгөх тухай тогтоолын төслийн задаргааг хэлэлцсэн байна. Бүлгийн гишүүд валютын ханш буурахгүй байгаа, өргөн хэрэглээний үнэ нэмэгдэж байгаад арга хэмжээ авахгүй байгаа талаар шүүмжлэлтэй хандсан байна. Мөн энэ онд царцаасан барилгуудад хийсэн аудитын дүгнэлтийг хэлэлцжээ. Урьдчилсан байдлаар Сангийн сайдын багцад 139 тэрбум  төгрөг байгаа. Энэ мөнгийг хөрөнгө оруулалтад зөв хуваарилах талаар хэлэлцжээ. Мөн УИХ-д өргөн баригдаж байгаа хууль тогтоомжийн төслүүд хэлэлцэгдэхгүй байгаа. Хаврын чуулганаар хэлэлцэх асуудлын жагсаалтад өргөн барьсан төслөө багтаасан хэдий ч хэлэлцэх асуудлыг урагшлуулахад санал нэгдсэн байна.  Монгол Улсын Ерөнхийлөгчийн өргөн барьсан Засгийн газрын тухай хуульд нэмэлт өөрчлөлт оруулах тухай хуулийн төсөлд тус бүлэг завсарлага авсан. Завсарлагааны хугацаа дуусаагүй тул үргэлжлүүлэн саналаа нэгтгэж байгаа юм байна. Түүнчлэн Х.Тэмүүжин сайдыг огцруулах хуулийн төслийг гишүүн О.Баасанхүү өргөн барьсан. Энэ асуудлыг Хуульзүйн байнгын хорооны хуралдаанаар өнөөдөр 14.50 цаг хэлэлцэнэ. Тус бүлэг байнгын хорооны хуралдаанаар хэлэлцсэний дараагаар байр сууриа нэгтгэх аж. “Шударга ёс” бүлгийн дарга Н.Батцэрэг мэдээлэл хийснийхээ дараа сэтгүүлчдийн сонирхсон асуултад хариулсан юм.

6

-Танай бүлгийн О.Баасанхүү гишүүн Хуульзүйн сайд Х.Тэмүүжинг огцруулах асуудлыг өргөн барьсан. Бүлгийн гишүүнийхээ байр суурийг дагах уу?

-Энэ асуудал дээр ойлголцолд хүрнэ гэж бодож байна. Бараг бүлгийн гишүүнээ дагана. Гэхдээ байнгын хорооны хуралдаанаар хэрхэн хэлэлцэгдэхээс шалтгаална. Өргөн барьсан үндэслэлүүдийг Х.Тэмүүжин сайд юу гэж харж байна. Төрийн өндөр албан тушаалтны эрх мэдлийн хэм хэмжээгээ хэтрүүлж үү гэдгийг Хуульзүйн байнгын хорооны хуралдаанаар хэлэлцэнэ. Бид хамтарч Засгийн газар барьж байгаагийн хувьд өнгөрсөн хоёр жилийн хугацаанд дэмжиж ажилласан. Одоо ажлын үр дүн ямар байгааг асуух цаг болсон.

6

-МҮАН, МАХН хоёр Засгийн газрын тухай хуульд нэмэлт өөрчлөлт оруулах асуудал дээр зөрчилдсөн гэсэн. Үнэн үү?

-Ямар нэг асуудал хэлэлцэхэд санал зөрөлдөх зүйл байдаг.  Олонхийн саналаар шийдэгдэнэ. Аль нэг намыг онцлохгүй.

5

Н.Энх