Украины зүүн хэсэгт орших Славянск хотод үл таних этгээдүүд Оросын талыг баримтлагчидтай буудалцсаны улмаас гурван хүн амиа алдаж, “Ройтерс” агентлагийн хоёр сэтгүүлч шархатсан тухай “ВВС” агентлаг мэдээллээ. Оросын эрх баригчид Украинчуудыг буруутгаж, хариуцлага хүлээхийг шаардсан аж. Харин украины “Баруун жигүүр” хэмээх хэт үндсэрхэг үзэлтэний бүлэг оросууд энэхүү буудалцааныг зохион байгуулсан хэмээн буруутгаж үнэнийг олохыг Засгийн газраасаа хүссэн гэнэ. “Баруун жигүүр” бүлэглэл нь өнгөрсөн онд Ерөнхийлөгч Виктор Януковичийг түлхэн унагахын төлөө тэмцэлд идэвхтэй оролцож байсан юм.
Оросын төв “Ort 1” телевиз “Оросын талыг баримтлагчид руу баг зүүсэн буутай этгээдүүд халдахыг завдсан. Амиа алдсан гурван хүн бол халдлага үйлдсэн этгээдүүд” гэж мэдээлсэн байна. АНУ-ын Төрийн нарийн бичгийн дарга дээрх халдлагад Оросын талыг буруутгаж “Украинчуудыг хооронд нь алалцуулж байна” хэмээжээ.
Женев хотноо болж өндөрлөсөн Украины асуудлаарх дөрвөн талт хэлэлцээрийн үр дүнд түрэмгийлэл, хүчирхийллээс зайлсхийхээр шийдвэрлэсэн ч ийнхүү зэвсэгт мөргөлдөөн гарч, хэлэлцээр үр дүнгүй болов.
Б.Дэлгэрцэцэг