Гэрэл зургуудыг Н.Ариунаа
Өчигдөр шөнөөс эхлэн Улаанбаатар хотыг манан бүрхэж, өглөөний нислэгүүд цуцлагдаад байсан. Харин одоо манан харьцангуй шингэрч, олон улсын нислэгүүд үйлдэгдэж эхлээд байна. Ер нь бол арванхоёрдугаар сарын өдийд Улаанбаатар хот манан дунд умбаж байсан тохиолдол байхгүй гэдгийг нийслэлийн иргэд мэдэж байгаа. Тиймээс Ус, цаг уурын эрдэм шинжилгээний хүрээлэнгийн ээлжийн инженертэй холбогдож манангийн шалтгааныг тодрууллаа.
Өмнөд хөршөөс орж ирсэн манан гэгдээд байна. Үнэхээр тийм үү? гэхэд “
Тийм зүйл байхгүй” гэж хариулж байна.
Харин хүйтний хэм -29 градус хүрч байтал, хүйтэн гадаргууд харьцангуй дулаан агаарын масс орж ирсэн нь Туул голын хөндийг дагаж, улмаар Төв аймгийн Угтаал, Зуунмод хотод, наашлаад Улаанбаатар хотод ихээхэн хэмжээний манан үүсэх шалтгаан болжээ.
Хэрэв салхины хурд нэмэгдвэл манан хөөгдөх учиртай аж. Гэсэн ч манан арилахгүй байгаа шалтгаан нь салхигүй тогтуун байгаагаас гадна Улаанбаатарын утаатай холбоотой гэж байна. Мөн ДЦС болон автомашинуудаас гарч байгаа элдэв төрлийн утаа энэ мананг барьж байгаа шалтгаан байх магадлалтай гэлээ. Мөн нар гарсаны дараа манан арилах ёстой ч, арилахгүй байгааг мэргэжилтэн хэлж байна.
Ер нь бол Увс нуурын хотгор гэхчлэн нууруудын хөндий дагаж манан үүсэх үзэгдэл нийтлэг байдаг аж. Харин голын хөндий дагаж манан үүсэх, тэрдундаа Туулын хөндийг дагаж манан үүссэн үзэгдэл тэр бүр тохиолдоод байдаггүйг, лав сүүлийн жилүүдэд үзэгдээгүй гэдгийг хэлж байсан юм.