Энэ өдрийн мэнд, эрхэм уншигчид аа. Амдралын эрээн бараан, элдэв сонин бөөгнүүлсэн баасан гарагийн бичлэг та бүхэнд хүрч байна. Ингээд 3 хоног шоудаж дугаар андуурч гэр бүл үймүүлэх шахсан нэг эрийн яриа хөөрөөгөөр эхлүүлье.

:

1.Хэн нь надтай өрөөнд орох юм

Хорооллоос суусан нэг залуу их л соёлтой мэндэлсэн авч айхтар архи сэнгэнүүлжээ. Нэг зүйл дээр алдаа гаргаснаа дахин дахин яриад байлаа.

.

З/зорчигч/ -... Буруу залгасан байна  л даа би. Балай юм. Энэ манай тэр охины утас 9585... байхгүй юу. Тэгсэн би нэг буруу залгачихаад авахгүй болохоор нь дахин дахин залгаад байсан юм байна л даа.

Х -Хэн рүү тэр вэ хөө?

З- Харин энэ хүүхэн рүү. Тэгсэн нөхөр нь хардаад бөөн юм болоод байна гэнэ ээ

Х- Танихгүй хүүхэн рүү дугаар андуураад баахан залгачихсан юм уу?

З -Харин тийм л дээ хөө. Манай хүүхний дугаар 9585... байхгүй юу би тэгээд аваачаад энэ сүүлийн тоог ингээд буруу дарчихаад. Тэгээд тэр чигтээ залгаад байхгүй юу. Тэгсэн бүр балай юм болж нөхөр нь ч хардаад бараг зодсон юм уу, яасан юм над руу яриад загнаад бүр балай юм болжээ. 3 хоног уучихсан чинь одоо бүр хольж хутгаад.  Ажил дээрээ очиж унтах гээд явж байна...

Үе чацуу байрын эр ийн ар араас нь урсган ярьж нэг зүйлээ хэд хэд давтаадахав. Буцаад согтоод байгаа бололтой санагдлаа.

З -Тэгсэн нэг эрэгтэй нөхөр залгаад ална шулна гээд. Энэ ухаалаг утас чинь бас тэгээд дутуу дарахаар салахгүй байгаад байдаг юм уу, хамаг яриа цаашаа сонсогдоод.  Би ямар яасан биш. Надад ямар хүүхэн шуухан дутсан биш тэ, нээрээ ккк... Зөндөө л байна ш тээ. Сая авгай бүр үглээд болдоггүй, тэгэхээр нь ажил дээр очиж унтая гээд гараад ирлээ. Маргааш бас хөдөө явах ч юм шиг болоод унтаж архиа гаргахаас. Бас яамны хүмүүстэй явах юм байна.

Х -Чи тэгээд хөө хэдэн өдөр дараалсан юм аа даа?

З -Өнөөдөр чинь гурав дахь өдөр биз дээ тэ. Өө тэгвэл 3 өдөр болчихсон юм байна.  Бүтэн сайнд эхэлсэн байхгүй юу.

:

Залуугийн утас нь дуугарлаа. “Байна уу, би ажил руу буудал дээр очиж хонох гээд явж байна. Сая нөгөө ажлаас ярилаа. Ойрхон говь руу явчихаад ирнэ гэж байна. Уусан юм гарахгүй л байна. Жоохон унтъя даа. Надад томилолт бичсэн байна гэсэн ш тээ...” Манай хүн тасралтгүй ярьсаар дундуур нь надад гараараа дохиж замчилсаар 10 дугаар хороололд ирж нэгэн баар пааб буудал гэсэн байрны гадаа зогсчих гэж дохилоо.

.

Би машинаа унтрааж ярьж дуусахыг нь тэвчээртэй хүлээлээ.

.

“...за би ажил дээрээ унтлаа. Тэгээд би мөнгө цуглуулаад өгнө өө. Тэгье...” Яриагаа дуусгаад “за хөө 1500 гарсан байна уу” гэснээ “за дотроос орж авч өгнө өө” гээд буух гэснээ над руу харж “хөөш, чи ер нь дагаад ор” гэлээ.

.

Би залхуурсан ч дагаад орлоо. Шатаар өгсөх зуураа манай хүн “Энэ манай буудал. Хүүхэн шуухан утсаар дуудаж муудах юм юу байхав. Яавал ч яана ш тээ. Юун хүний эхнэр эргүүлэх зүгээр бэлэн л байгаа ш тээ” гэсээр дотогш орлоо. Үүдэн хэсэгт буудлын ресепшн бололтой нэг хүүхэн, үйлчлэгч байрын 30 гаран насны 2 хүүхэнтэй сууж байна. Манай хүн “ийшээ 1500 төгрөг өгөөдөх дөө” гэлээ. Тэгснээ “сонин юу байна даа, уйдацгааж байна уу” гэж мушийснаа над руу харж нүд ирмэлээ. Тэгснээ “Нөгөө дээр өрөө сул байна уу. За за би жоохон унтах гэж ирлээ. ...хэнээ чи нэг хоёр пиво аваад дээшээ гараад надтай хуваагаад уучих. Би тэгээд амарлаа” гэлээ. Голын хүүхэн “Өө би одоо буугаад харих гээд байж байна. Манай хүүхэд ирж байгаа ш тээ” гэлээ. Мань эр нэлээн улайрсан байртай болж “алив ... хэн чи тэгвэл хамт ороод, хурдал пиво уучихья. Аль өрөөнд орох юм” гэж шахлаа. Өнөөх хүүхэн нь “үгүй би дээр цэвэрлэгээтэй” гэж бултлаа. Бас над руу санаа зовнингүй харахаар нь мөнгөө авсан би гарахаар хаалга зүглэлээ.

.

Ард “за маяглацгаагаад бай. Нэг нь хурдхан дээшээ гараадхаа” гэх захирангуй эрийн дуу сонсогдлоо. Ажлын байрны бэлгийн дарамт үзүүлэгч юм уу ч гэж бодогдлоо. Гэхдээ яг хараагүй байж хүн гүтгээд яахав.

.

2.Буудлын камер осолтой

Бичил хүргүүлсэн залуу тун яриа нэгэн байлаа. “Ёооё за харьж унтья даа... хөөе ах, энэ машины камер уу ...хараагүй юм байна. Би бас ийм камер тавьдаг газар ажилладаг юм” гэлээ.

.

Х -Камер тавьдаг компани одоо зөндөө болжээ. Тэгээд ашигтай л байдаг болоод байгуулагдаад байдаг байх даа.

З/залуу/ -Өө яахав. Тэгээд ажил байгаад л байна ш тээ. Баригдаж байгаа барилга бүр л камер тавина. Гэрийнхээ гадаа ч тавиулж л байна шүү дээ. Гэхдээ нөөцийн камерууд тусгай зөвшөөрлөөр тавиулна л даа. Хамаа намаагүй тавихгүй. Яавч болохгүй тэр.

Х -Нөөц гэж арай угаалгын өрөө мөрөөнд тавьдаг юм биш биз дээ?

З -Тавихаа хүрвэл тавина аа. Гэхдээ тэр бичлэг нь задрах юм бол бөөн юм болно ш тээ.

Х -Бас аюултай л юм байна даа. Буудлууд бол одоо яах уу. Ил бол тавих л биз. Далд бол бас байх уу?

З -Аан Пи-нууд худлаа буудал ажиллуулж байгаа нэрийдлээр “порно” кино хийх гээд шаачихдаг тэ. Бичээд нөгөө гар удирдлагатай камераар. Тэрийгээ эвлүүлээд л, айн аюултай шүү. Манай нэг найз хөдөө буудалд байсан камер тавьчихсан байгааг нь барьж байсан гэсэн. Хөшиг дээр нь нэг жоохон гэрэл хаяад байх шиг санагдаад тэгсэн ханын гэрлийн суурин дээр зоочихсон байсан гэсэн. Нөгөөдөх яахав хүүхэнтэй хэвтэх гээд орохгүй юу... /утас нь дуугарлаа/ ...Өө “пи” захирал залгаж байна ш тээ. “Байна уу, байна байна. Нисэх гэж байна аа... аанхан за ...за за”.

Х -Яасан дарга чинь гадаадаас ирж байгаа юм уу?

З -Тнх, наашаа нисэх гэж байна гэнэ ээ. Тосно ш тээ. Манайх хөдөө аймагт бас нэг ажил сүлжээ оруулж байгаа. Тэрнийхээ ажлаар явж байгаа юм. Судалгаа мудалгаа гээд л явсан юм шиг билээ. За байз яах вэ ... машинаа аваад шууд шаах уу. ... за яахав юу ч болсон ийшээ очьё доо. Таны энэ камер хэд гэх үү?

Х -Миний энэ тийм үнэтэй биш ээ. Манай найз авчирч өгсөн юм.

З -Батерей яаж цэнэглэж байна. Авч байж цэнэглэдэг юм уу, өө тэгвэл бас супер биш л юм байна.

Х -Хөөе дүү тэгээд буудал энэ тэрийн өрөөнүүдэд нууц камер тавьсан тавиагүйг яаж мэдэх вэ?

З -Нөгөө хяналт тавьдаг мэргэжлийн хяналт энэ тэр л шалгах байх даа. Гэхдээ гэнэт хийхгүй бол “пи”-нууд авчихна ш тээ, тэ.

Х -Нээрээ тэгэх байх даа.

З -Камертай буудлууд ч зөндөө байдаг юм даа. Би бол камертай өрөөг мэдчихээд дуугардаггүй ш тээ. Чимээгүй л байна. Нууц камерууд байдаг байхгүй юу. Тэгээд наанаас нь юм тохоод л шаачихдаг юм. Сап гээд л болоо. Таг болно.

Х -Би мэдэж байна шүү л гэсэн үг байна даа тэ.

З -Тийн. Хүн яг тийм өвчтэй болчихдог юм байна. Одоо энгийн дэлгүүр энэ тэрд орно тэ. Тэгэхээрээ хамаг юмыг эргүүлж тойруулж хараад л хулгайч шиг. Камер байх боломжтой өнцөг цэгүүдийг нь мэдэж байгаа болохоор яг л онлайн төслөөр байх л ёстой газар гээд харахаар байдаг л байхгүй юу ккк. Буудал муудал адилхан ш тээ. Эндээс хоёулаа харагдана. Эндээс нөгөө ... юу нь харагдана. Эндээс хүүхэн харагдана гээд л тал талаас нь харахаар тавина ш тээ.

Х -Аймаар хардаг, айн. Задгай заваан буудлууд бол магадлалтай юм байна даа тэ?

З -Угаасаа ш тээ. Тэгээд нөгөөдөхөө эвлүүлээд л болоо. Монгол порно гээд зөндөө байна ш тээ. Би чинь яг гол цөм дээр нь байгаа хүн чинь сонин биш болчихсон. Хараад энэ дотор нь би байх вий дээ гээд л бараг шалгаад хайгаад ккк. Хаана хаана яалаа ухааны юм бодоод явчихаж байгаа юм чинь.

Х -Аюултай юм аа.

З -Ганц камер тавина гэж байхгүй ш тээ. Тал талаас нь тусгаад эвлүүлэг хийнэ ш тээ. Үйлдэл чинь зэрэг харагдана. Нүүрний хувирал, орны толгой дээр тавьчихсан байдаг шүү. Тачаадаж барьж байгаа нүүрний хувирал тэ. Нөгөө нэг шилэн мэлэн толгойтой орнууд байдаг тэ, тэд нарт тавьчихдаг байхгүй юу. Толь байна. Толинд нь нэг камер шаачихна ш тээ ...ккк.

.

3. Хар тен бий билүү

32-ын уулзвар гараад уруудаж явтал нэг биеэрхүү залуу өөрөөсөө нэлээн эгчмэд 50 орчим насны эмэгтэйн хамт гар өргөлөө. Зогстол тэр хоёрыг гаргаж өгч байгаа нэлээн халмаг хоёр хүүхэн бас хаалган дээр иржээ. Залуу “за баяртай баяртай. Хариарай, амарцгаагаарай” гээд өнөөх эгчмэд эмэгтэйг суулгаж аваад нөгөө хоёрыг суулгахгүй цааш түлхэж, нөгөө хоёр нь хамт суух гэж зүтгэж нэлээн юм болов. Тэгээд нэг юм хаалгаа хаагаад авлаа.

.

З/залуу/ -Ёооё энэ Гүнжээ чинь ямар аймаар тасардаг юм бэ. Ах жоохон явж байгаад буцаад эргэчихээрэй.

Э/эмэгтэй/ -Гүнжээ худлаа, согтоогүй. Чоно байхгүй юу. Одоо Мөөгийг авчихья. Тэгээд Дарь-Эх орно оо.

З -Буянаа бас ямар аймаар чалчаа юм бэ. Тийм учраас би одоо Гүнсээ Буянаа хоёртой дахиж архи уухгүй гэж амалья. Ах цаашаа жоохон яваад харалдаа зогсчих. Саяны хоёрын арай бүдүүнийг нь салгаж аваад л тэгээд Дарь-Эх явах юм.

Э -Гүнжээ чоно байхгүй юу бүгдийг мэдэж байгаа. Тэгээд салахгүй байгаа байхгүй юу.

З -Одоо тэгээд яана гээд байгаа билээ. Танайд очно гэл үү. Тэгээд танай нөхөр шанаадахгүй байгаа.

Э -За тэр муу одоо гайтай байсан ч юу юм бэ.

З -За Түвшээ ах шиг шанаадахгүй л байх тэ. Хэцүү шүү. Хоёр ч удаа шанаадуулсан удаатай шүү. Та яг юу гэж хэлсэн. Та хоёр цуг байгаа юм уу?

Э -Байгаа байхгүй нь хамаагүй ээ, тэгээд очоод л хар за кккк. Өнөө хоёр яаваа салдаггүй юу...

.

Бид гурав замын эсрэг талд гарч өнөө хоёр согттуу хүүхнийг салахыг хүлээж хэсэг зогслоо. Энэ хооронд нөгөө хүүхэн Мөөгий гэдэг нэгэн рүү залгатал тэр нь тасраад унтаж байна гэсэн хариу авлаа.

.

Хоёр хүүхэн унаж босон нэлээн удлаа. Тэгээд нөгөөх бүдүүн гээд байгаа эмэгтэй нь салж зам даган алхав. Нөгөө хоёр ч “за алив ах эргээрэй. Тэр хүүхнийг замаас нь авчихья. Хар тен бий билүү. Бид хоёр дотор харагдах уу. За гялс эргээрэй гэж намайг шавдууллаа. Эргээд очтол нөгөө хүүхэн нь буцаад алхчихав. Арын хүүхэн дуудаж авчрахаар бууж залуу бид хоёр кабинд үлдлээ.

.

З -Ёооё бие биендээ агсан тавьдаг хүүхнүүдээс зугатах гэж. Ядаргаатай юм. Энэ төрийн албан хаагч гэж нэр төдий юм биш үү. Хамаг байсан мөнгөөрөө авгай хүүхнүүдтэй шоудаад хамаг байдгаараа татуулаад. Одоо хоёр нь таван мянган төгрөгөө нэхээд л байна. Одоо хурим болох гэж байгаа гээд. Цалин гэж гэртээ аваачихгүй юм биш үү. Хамт олон гэдэг чинь ингээд бас хэцүү юмаа ах, орхиод явж болохгүй. Өө за за нөгөө Гүнсээ нь бүүр согтоод. За за би буухаас.

.

Буусан хүүхнийг өнөө хоёр согтуу нь голдоо хийж аваад газраас өргөж цааш баарны хаалга руу чирж яваа харагдав. Залуу надад мянган төгрөг сарвайж ах жоохон тэсэхгүй юм уу гэлээ.

.

Би ч  эелдгээр татгалзаад замаа хөөлөө.

.

4.Өвөө дахиад залгалаа

Дээр нэг надтай таарч охиноо ачийнхаа хамт төрөх эмнэлгээс авч гарсан хөгшний талаар уншигчид санаж байгаа байх. 4 сарын такс бичлэгт орж бай луу даа. Би нэг гэрт нь орж гараар чимхсэн буузаар баахан дайлуулдаг. Тэгээд нөгөө ачийнхаа ягаан дэвтрийг эмнэлгээс аваад өг гэж гуйдаг. Тэр өвөө дахин утастлаа. Гэхдээ их шөнө өө. Бараг шөнө 2 цаг дөхөж байсан байх.

.

Ө/Өвөө/ -Байна уу хүүхээ. Чи нөгөө такси жолооч ...хэн Хоовон хүү мөн үү?

Х -Өө тийм байна. За өвөө яав танайхан сайн уу. Ач нь том болж байна уу?

Ө -аан за за бүгдээрээ сайн сайн. Өвөө нь нэг юм гуйх гээд. Манай нөгөө улаан жоохон өвдөөд. Түргэн дуудаад ирдэггүй. Утсаар зөвлөөд. Нэг эм авч уу гэлээ.

Х -Аан за. Аав нь ирсэн үү?

Ө -Үгүй ээ, чимээ алга болоогүй юм байлгүй. Тэгээд хүүхээ манай энэ ойр шөнө ажилладаг аптек алга. Чи нэг ойр гарвал тэр эмийг нь оруулаад өгөх тус байна уу гэж.

Х -Өө за... харин яах уу. Ямар эм гэсэн бэ?

Ө -Нуропин гэсэн билүү, алив чи охинтой ярь даа.

О/охин/ -Өө сайн байна уу та. ккк, уучлаарай манай охин аягүй өндөр халуураад. Эмийн сан ойр байдаггүй. Тэгээд таныг гуйгаад.

Х -За за ойлгож байна. Ямар эм гэлээ?

О -Нурофен гэсэн.

Х -Хүүхэд өвдөөд байхад яаж үгүй гэхэв дээ. Би аваачаад өгье дөө.

.

Ингээд гэртээ орсон байсан би буцаж гарлаа. Тэр эм нь ч байж л байдаг юм байна. Учрыг хэлбэл эм олгодог хүүхэн жоохон нярайд ийм эм өгөх ч гэж дээ гэсгээд дурамжхан өглөө.

.

Би аваад Ханын материалын тэрээд давхиад очлоо. Өвөө ирж байгаа сургаар гудамж амдаад зогсож байв. Бид хоёр товч мэнд мэдээд эмийг нь өглөө.

.

Өвөө “хэдэн цаас болов” гээд өврөө ухлаа. 8500 төгрөг гэвэл өвгөний гарын  хөдөлгөөн нь сулраад явчихлаа. Би уг нь таван зуун төгрөг татаж хэлсэн санаатай.

.

“Өө яасан айхтар үнэтэй эм бэ” гэлээ. Би за яахав, та байгаагаа өгчих дөө гэлээ. Өвгөн нямбай хуйлсан мөнгөө гаргаж тоолоод ”6000 л болж байна уу даа, чи тоол доо хүүхээ” гэлээ. Би мөнгийг аваад шөнө орой болсон тул гудамны үзүүрээс эргэлээ.

.

Үүгээр нялх хүүхдийн ханиад дарагдаагүй бололтой. Өглөө 7 цагийн орчим утас дахиад дуугарлаа.

.

Ө -За уучлаарай хүүхээд, амраахгүй эрт залгачихлаа. Өнөө жоохон чинь гүйлгээд халуураад тархи нь хөдөлсөн шиг байна аа. Нэг бариач руу л ухасхийх хэрэг байна. Хүү чи нэг ухасхийх зав бололцоо байна уу?

Х -Аан эм нь нэмэр болсонгүй юу?

Ө -Нэмэргүй юм. Тархи нь хөдөлсөн шиг байна аа. Шөнөжин уйлж бөөлжөөд эхийгээ амраасангүй.

.

Ингээд тус хийвэл дуустал гэдэг үгийг санан би дахиад тэдний гэрийг зорилоо. Өвгөн хашааныхаа гадаа зогсож байна. Би зогсоод “та ач, охин хоёроо аваад гараад ирэх үү. Хурдхан ухасхиичихээд ирье” гэвэл өвгөн “Чи буугаад ир хүүхээ. Манайд ор бариач болсон” гэлээ.

.

Бууж учрыг лавлавал өвөөгийн хажуу айлын хүүхэд хойшоо гүйж нэг бариач залж ирсэн гэнэ. Тэр нь надаас түрүүлж ирээд нөгөө жоохных нь толгойг барьж өгчээ. Би гэрт орвол цай цүй боллоо. Нөгөө жоохон нь бие нь амарсан бололтой хөлс нь бурзайчихсан унтаж байна.

.

Хоёр хөгшин санаа нь зовж байгаагаа хэлж тэтгэврийн мөнгөө авахаар нөгөө эмний бас таксины мөнгө өгч намайг бурзайлгана гэлээ. Гэхдээ түлээ нүүрс гээд тэтгэврийн зээл авсан тул өвгөн 7 сараас тэтгэврээ авч эхэлнэ гэнэ.

.

Хоёр хөшин дуу дуугаа авалцан “Үгүй тэр утасны цаанаас ярьсан эмч дэмий үнэтэй эм авахуулж бид хоёрын халаасыг гүвчихлээ. Ер нь юу мэдэж утсаар хүнд ийм тийм эм өг гэдэг байна аа. Дэмий эм аваагүй бол ядаж чамд такси км-ийн мөнгө өгөхгүй юу” гэцгээв.

.

“За за тэгээд наадмын өмнө ирээд мөнгө авья даа. Та хоёр сайхан буузаа хийгээрэй” гэж би хөгшчүүлийг тайтгаруулаад гарлаа. Охин нь санаа нь зовсон бололтой цаад өрөөндөө сууж байгаад гарахад “Баярлалаа ахаа, наадмаар ирээрэй” гэлээ. Намайг биечлэн гаргаж өгсөн өвгөн. Аминчлан хэлж байна. Охины нөхөр ирэхггүй байгаа бөгөөд санаа нь хувирсан талдаа болсон ба утсаар охин нь нэлээн яриад иймэрхүү зүйл хэлсэн талаар хов дуулгалаа.

.

Өвгөн намайг хөдлөхөд бас нэг зүйлийг лавлан асуусан нь хүүхдийн мөнгө яагаад сардаа орохгүй удаад байдаг юм бол гэсэн асуулт байлаа. Ач охиных нь сүүлийн хоёр сарын мөнгө 40 мянган төгрөг дансанд нь ороогүй байна гэнэ. Тэр мөнгөөр тогны мөнгөө төлөх бодолтой байсан ба өнөөдөр тогийг нь тасалж магадгүй гэж санаа зовж суугаагаа хуваалцаад гар өргөн дохисоор үлдлээ. Настангууд нялхсууд ийн хоолгүй хоночих гээд байгаа нь хүнд бодолд автууллаа. Нялх охиноо орхиод зүг буруулсан тэр залууг ч танихгүй хэрнээ “хөгийн новш вэ” гэж нэг сайн харааж авлаа.

.

Үүгээр баасан гарагийн бичлэгээ өндөрлөе. Уншигч Аяатунгаагийн сэлбэгийг нэг найздаа захин хэлсэн байгаа. Бас Юм үз-ийн найрсаг саналыг Хүрэл хүлээн авсан байх гэж бодож байна. Сэтгэгдэл үлдээж урам өгч, алив шүүмжлэл бас зарим нэг гоочлолоос тууштай өмөөрч дэмждэг уншигч нартаа баярлаж талархдагаа дахин хэлье. Дараа сонин ихтэй уулзацгаая. Сайхан амраарай, баяртай манайхаан...    

_

Иргэний дуу хоолойг нийгэмд түгээгч, Таксич Хоовон Хөх