Өчигдөр буюу арванхоёрдугаар сарын 16-ны өглөө Өмнөговь аймгийн Ханбогд сумын нутаг дахь Оюу Толгой төслийн ажлын байран дээрээ дахин нэг монгол ажилчин амиа алджээ. Төслийн гэрээт компанийн ажилтнууд спиртын хольцтой шингэн уусны улмаас нийт таван хүн хордож, нэг нь амиа алджээ. Талийгаачтай нэг гэрт байрладаг ажилчин өглөө 06:18 цагт дуудлага өгч, SOS эмнэлгийн яаралтай тусламжийн баг нэн даруй очсон боловч тусламж үзүүлэхэд хожимдсон байж.
Оюу Толгой ХХК-иас өгч буй мэдээллээр бол ажилчид ажил тарсны дараа спиртын хольцтой шингэн уусан нь тогтоогдсон гэнэ. Талийгаачийн биед хүч хэрэглэсэн буюу гэмт хэргийн шинж тэмдэг бүртгэгдээгүй гэсэн мэдээллийг өгч байна.
SOS эмнэлгийн хяналтанд эмчлүүлж байсан хоёр ажилтны биеийн байдал хүндэвтэр байсан учраас хяналт тавьж буй эмч, хоёр сувилагчийн хамт тусгай нислэгээр буюу баасан гаригийн орой Улаанбаатар хотод авчирч, яаралтай эмчилгээнд оруулжээ.
Нөгөө хоёр ажилтны тухайд биеийн байдал нь хөнгөвтөр байгаа тул төслийн хүрээнд үйл ажиллагаа явуулж буй SOS эмнэлэгт хэвтэн эмчлүүлж байгаа аж.
Цагдаагийн байгууллага энэхүү хэргийг шалгаж эхэлсэн бөгөөд компанийн зүгээс шаардлагатай арга хэмжээ авч, хамтран ажиллаж байгаа хэмээн мэдэгджээ.
Сануулахад, өнгөрөгч сарын 18-19-нд шилжих шөнө Оюутолгой ХХК-тай гэрээлэгч, кемпийн хоол хүнс, ахуй үйлчилгээг хариуцдаг Си Ай Эс Монголиа компанид ажилладаг байсан монгол залуу төслийн байранд амиа алдсан. Өнөөдрийг хүртэлх хугацаанд хэргийн учир тодорхой болоогүй байгаа. Оюутолгой төслийн China camp-ын 50-иад ажилчин энэ хэргийг үнэн мөнөөр нь тогтоох хэрэгтэй, талийгаачийн үхлийн шалтгааныг тодорхой болгох ёстой гэсэн үүднээс ажлаа хаяж Өмнөговь аймгийн Ханбогд суман дахь ажлын байраа орхин Даланзадгад руу явж байсан талаар бид мэдээлж байсан. Гэхдээ өнөөдрийн тухайд энэ хэрэгтэй холбоотой ямар ч шинэ мэдээлэл байхгүй байгаа юм.
Богема