Украины зүүн хязгаарын Донецк мужид амьдарч буй иргэдэд ОХУ-ын Засаг захиргаа тусламж үзүүлэхээ мэдэгдсэн юм. Оросын “Орт 1” телевиз өчигдөр зүүн хязгаарыг чиглээд явж буй тусламжийн 287 ачааны машиныг харуулсан билээ. Тэгвэл энэхүү тусламжийн цувааг Украины газар нутагт нэвтрэхийг Ерөнхийлөгч Петр Порошенко хориглосон тухай “Ройтерс” агентлаг мэдээллээ. Украины Батлан хамгаалахын сайд Валерий Гелетея “Энэ тусламжийн цуваа нь ирээдүйд Оросын арми Украинд нэвтрэх нөхцлийг бүрдүүлнэ гэж эмээж байна” гэжээ.

1

Тус улсын Дотоод хэргийн сайд Арсен Аваков “Оросын тусламжийн бараа илгээж буй үйлдлийг дотоод хэрэгт хөндлөнгөөс оролцох оролдлого гэж харж байна. Оросын ямар ч тусламжийн цувааг Украины газар нутагт нэвтрүүлэхгүй” гэсэн байна.

1

ОХУ-ын Ерөнхий сайд Дмитрий Медведев “287 ачааны машинаас бүрдсэн цуваа 1800 тонн тусламжийн барааг Донецк мужид хүргэх зорилготой. Тусламжийн бараанд эм тариа, эмнэлгийн тоног төхөөрөмж, хүүхдийн хоол тэжээл, аяны хөнжил, цахилгаан үүсгүүр багтсан. Порошенкогийн бодож байгаа шиг зүйл огт биш” гэж хэлжээ.

Харин НҮБ-ын Аюулгүй зөвлөл Петр Порошенког шүүмжилж, Донецк мужид яаралтай тусламж хэрэгтэй байгааг сануулсан байна.

1

Б.Дэлгэрцэцэг