УИХ-ын чуулганы нэгдсэн хуралдаанаар гишүүдийн 94.8 хувийн саналаар АТГ-ыг толгойлох болсон хурандаа Н.Ганболд 93.1 хувийн саналаар дэд даргад тохоон томилогдсон Б.Хурц нартай холбоотой мэдээлэл сүүлийн үед олон нийтийн анхаарлыг татаж буй.
Шинэ удирдлагууд томилогдоод тун удалгүй АТГ-ын Гүйцэтгэх албаны дарга Ө.Алтангадасын оронд Үндэсний аюулгүй байдлын зөвлөлд ажиллаж байсан Н.Эрдэнээг томилох тушаал гаргасан бол Тамгын хэлтсийн дарга Г.Бадарчийг халж, түүний оронд мөн л Үндэсний аюулгүй байдлын зөвлөлийн Ажлын албаны даргын орлогчоор ажиллаж байсан Ц.Өнөрбаярыг томилсон юм. Халаа сэлгээ үргэлжилж 14 ажилтныг үүрэгт ажлаас нь чөлөөлсөн.
Эх сурвалжийн мэдээллээр тэднийг халах болсон үндэслэлээ АТГ-ын хуулийн 19.1 зааснаар АТГ албан хаагчид урьд өмнө ямар нэгэн зөрчил гаргаж байгаагүй, мөн авлигын талаар тодорхой мэдлэгтэй байх зэрэг шаардлагыг хангаагүй нийт 14 албан хаагчийг халсан аж.
Тухайлбал, 2011 оны арванхоёрдугаар сарын хоёрны өдөр ажлаас чөлөөлөх тухай 51 дүгээр тогтоолыг үйлдэж
1.Ц.Эрдэнэцэцэг /Хэвлэл мэдээллийн ажилтан/
2. Д.Батбаяр /Ч.Сангарагчаагийн шадар хамгаалагч/
3. Г.Зоригттөгөлдөр /Д.Сундуйсүрэнгийн жолооч/
4.Г.Өлзийсайхан /1919 гомдол мэдээллийн оператор/
5.Ч.Хүдэрчулуун /1919 гомдол мэдээллийн оператор/
6.Ч.Наранцэцэг /Тоо бүртгэлийн ажилтан/
7. Б.Туяа /Архив, бичиг хэргийн ажилтан/ нарыг ажлаас нь чөлөөлсөн байна. Харин арванхоёрдугаар сарын таванд найман мөрдөн байцаагчийг түвшин тогтоох шалгалт аваад тэнцээгүй хэмээн
1.Н.Батзогсох /Мөрдөн шалгах хэлтсийн хоёрдугаар тасгийн дарга/
2.Ж.Халиун /Мөрдөн байцаагч/
3.Д.Золжаргал /Мөрдөн байцаагч/
4. П.Шижир /Мөрдөн байцаагч/ нарыг ажлаас нь чөлөөлжээ. Дээрх 14 ажилтнаа халах болсноо үндэслэлд тус газрын дарга комиссар Н.Ганболд дараах тайлбарыг өгч байна.
- АТГ-ын удирдлагууд ажилтнуудаа үндэслэлгүй халсан гэсэн мэдээлэл цацагдаж байгаа. Энэ мэдээлэлд та ямар тайлбар хийх вэ?
- Би хэвлэлээр энэ талаар мэдээлэл өгсөн шүү дээ.
-Албан ёсоор нэг ч мэдээлэл хийгээгүй. Тэдгээр 14 ажилтныг чухам ямар үндэслэлээр халсан юм бэ?
-Орон тооны цомхотголд орж халагдсан ажилтнууд бий. Төрийн албаны хууль, хөдөлмөрийн хууль, бусад хууль тогтоомжийн дагуу зургаан сарын цалинг нь өгөөд, өөрсдийнх нь хүсэлтийн дагуу шилжүүлж байгаа.
-Мөрдөн байцаагч нараас мэргэжлийн шалгалт авч тэнцээгүй ажилтнуудыг үүрэгт ажлаас нь чөлөөлсөн юм уу?
-Тийм
Дашрамд дурдахад АТГ-аас халагдсан ажилчид нь тус газрын дарга Н.Ганболд, дэд дарга Б.Хурц нарыг хууль бусаар ажлаас халсан хэмээн шүүхэд өгч буй гэнэ.
Н.Бүжин