Баянгол дүүргийн 19 дүгээр хороо, IV хорооллын нутаг дэвсгэр буюу Чингүнжавын гудамжийг Амарсанаагийн гудамжтай холбосон орон сууцны хорооллын дундах автозамын далангаас өндөр настай хүн, хүүхэд хоёр унаж гэмтсэн осол энэ сарын 22-ны орой гарсан. Уг зам нь ердөө таван метрийн өргөнтэй ба хоёр жижиг машин л зөрөх боломжтой. Гэтэл том оврын автобус уг замаар чихцэлдэж, өвөө хүү хоёрыг далан руу унагаасан бичлэгийг та бүхэн харсан байх. Барагцаалвал гурван метр өндөр бетон далангаас өвөө, хүү хоёр унаж, гэмтжээ. Хэргийг БГД-ийн Замын цагдаагийн тасагт шалгаж буй.

h

Өмнө нь хүн унаж нас баржээ

h

Яг энэ далангаас өмнө нь нэг эмээ унаж амь насаа алдсан. Хүн унаж бэртэж, гэмтэх тохиолдол цөөнгүй удаа гарсан гэж баттай эх сурвалж мэдээлэв. Тавхан метрийн өргөнтэй буюу хоёр жижиг машин шүргэлцэх шахам зөрөх энэ замын хажуугаар явган хүн зорчих талбай тун хомс юм. Явган хүний зам байхгүй болохоор иргэд, өндрийн ялгааг тусгаарлан суурийн блок шавардаж өрсөн далангийн хашлагыг дагаж, явна. Хашлага гэж хэлэхэд хэцүү нэг дан блок аж. Өөдөөс болон араас ирж яваа машинд шахагдан хүмүүс дээр нь гарч зогсох, хэтэрхий шахагдахдаа дээгүүр нь давж унах аюултай хэтэрхий намхан юм. Явган зорчигчид далангийн доогуур шороон замаар эсвэл замын хойд талд гараад байрнуудын урдуур явах боломжтой. Гэхдээ энэ нь төгс шийдэл биш болохоор иргэд, ялангуяа өндөр настай хүмүүс шатаар бууж, өгсөхөөс төвөгшөөж, ихэнхдээ автозамын хажуугаар зорчдог аж. Далан ч хэзээ мөдгүй нурж мэдэхээр болжээ. Ийм байдалд яагаад арга хэмжээ авдаггүй тухай, энэ асуудлыг хэн мэддэг талаар мэдэхийг хүссэн юм. Энэ блокон далан нь зам, барилгын мэргэжлийн хэлээр бол өндрийн ялгааг тусгаарлаж өгсөн тулц хана аж. Ийм тулц ханатай зам дөрөвдүгээр хорооллын 60 дугаар байрны ард талаас “Од” кино театр хүртэл үргэлжилнэ.

h

Олон жилийн өмнө барьсан эдгээр тулц хана хуучирч муудан, 60 дугаар байр луу нурах аюултай болсон гэнэ. Энэ тухай “Нарлаг-60” СӨХ-ийн дарга н.Лхагвасүрэнгээс тодруулахад “Энэ тулц хана бол манай СӨХ-д хамаагүй нийтийн эзэмшлийн талбай. Үүнийг засч, янзлахыг хороо, дүүрэг мэднэ. Харин миний хувьд энэ ханыг янзлаад хашлага, хаалт хийх, доогуур нь явсан шороон замыг засмал болгох хэрэгтэй байна гэж хороо, дүүрэгт ханддаг. Сонгуулийн үеэр ч зөндөө ярьсан. Ерөөсөө анхаарч, арга хэмжээ авдаггүй. Нурахад бэлэн болсныг нь чи харж байгаа биз дээ. Энэ бол жинхэнэ хот, дүүргийн дарга нарын хийх ажил. Ийм юмандаа мөнгө, хөрөнгө зарцуулах хэрэгтэй. Арга хэмжээ авахгүй бол сүүлийн үед харин осол энэ тэр гарах боллоо” гэж ярьсан.

h

Тэрбээр тулц хана болон ойр орчмыг нь засч янзлах 69 сая төгрөгийн төсөл бичиж дүүрэгтээ хүргүүлсэн нь дэмжигдэн, төсөл нийслэлийн Хөрөнгө оруулалтын газар очсон. Тэндээс дэмжигдэж, ирэх оны төсөвт хөрөнгө батлагдвал энэ орчин дээрдэнэ дээ гэж байлаа.

h

“Дарга нар л мэдэх байх”

h

Бид замын орчимд зогсож, энэ хавиар байнга явдаг иргэдтэй уулзав. Тэд “Энэ зам аль ч талаараа хүн явах боломжгүй. Урд талд нь 47 дугаар сургууль байгаа. Сургуулийн хүүхдүүд бол маш эрсдэлтэй замаар зорчиж байгаа юм. Хүүхдүүд чинь тэр болгон тойроод явахгүй, сургуулиасаа гараад л энүүгээр явдаг. Явган хүний зам байхгүй болохоор хоёр машин зөрөөд ирэхээр хүн гарч чадахгүй байдалд ордог. Далангууд нь их эвгүй. Энэ замаар явж байгаад машинд шахагдан унах аюултай. Ямар нэгэн байдлаар энэ зам, даланг засч янзлах хэрэгтэй санагддаг. Зам, уулзварыг гоё болгоод байгаа “Гудамж” төслийг нь хэрэгжүүлж бодоггүй юм болов уу гэж боддог. Дарга нар нь л мэддэг байхдаа” гэсэн.

h

Энэ тухай мэдээлэл авахаар БГД-ийн Дэд бүтэц, тохижилтын хэлтсээр ороход “Зам ашигласны татвар нийслэлд ордог учир тэндээс засч, янзлах хэрэгтэй” гэдэг хариултыг өгөв. Гэтэл нийслэлийн Автозамын газраас “Энэ далан бол өндрийн ялгааг тусгаарлаж өгч буй тулц хана. Бүхэл бүтэн байгууламж учир автозамтай холбоогүй” гэж тайлбарлалаа.

h

Ийнхүү эзэнгүй тулц хананд “нийтийн эзэмшил” гэдгээс өөр эзэн олж чадсангүй. Уулзсан бүхэн нийтийн эзэмшил гэдэг нэр цохож, мэдсэн ч мэдэхгүй царайлав. Нийтийн эзэмшлийн талбай гэдэг хэнийх ч биш эзэнгүй гэсэн үг биш баймаар. Нийслэлийн иргэд нийтийн эзэмшлийн талбайдаа зорчиж байгаад осолд өртөж, гэмтэж, бэртэн, цаашлаад амь насаа алдаж байна. Үүнийг хэн хариуцах вэ. Эзэнгүй газар унасан түүний хохь гэж хэлэхгүй нь лав байх. Нийслэлийн олны, дүүргийн иргэдийн амар тайван, аюулгүй байдлыг хангана хэмээн “амласан” дарга нараас хариуг нь асууя. Хөгжин цэцэглэж буй нийслэлд нь зохицомгүй, хэдэн арван жилийн настай, иргэдийнх нь амь нас, эрүүл мэндэд “заналхийлсэн” ийм газар буйг эрхэм хотын захирагч мэддэг болов уу. Үгүй ядахдаа БГД-ийн Засаг дарга Д.Оросоо энэ газрыг нэг бус харсан байх гэж найдаж байна. Тиймдээ, танаас энэ газрыг цэгцэлж, аюул дагуулсан эзэнгүй талбайнхаа эзнийг тодруулж, явган иргэддээ гишгэх газар, алхах чөлөө олгохыг хүсье. Иргэдийн хэлсэнчлэн “Гудамж” төслийг нь ч болтугай хэрэгжүүлээд энэ зам, тулц ханыг аюулгүй болгох хэрэгтэй. Тэгэхгүй бол энэ осол дахин давтагдаж, хүн гэмтэж бэртэн цаашлаад амиа алдахыг ч үгүйсгэх газаргүй байна.

h

/.

dfsasds