УИХ-ын чуулганы нэгдсэн хуралдаанаар Тамхины хяналтын тухай хуульд нэмэлт өөрчлөлт оруулах тухай хуулийн төслийг хэлэлцэж байна. Уг хуулийн төслийг  гишүүн Д.Эрдэнэбат санаачлан боловсруулжээ. “Энэ нэмэлт, өөрчлөлтөөр тамхины хяналтын талаар төрөөс баримтлах бодлого, зарчим, төр иргэн, хуулийн этгээдийн хүлээх нийтлэг үүрэг, тамхины үйлдвэрлэл, худалдаа, сурталчилгааны зохицуулалт, тусгай зөвшөөрөл, тамхины хэрэглээ, хууль тогтоомж зөрчигчдөд хүлээлгэх хариуцлагыг тодорхойлсон. Мөн 21 нас хүрээгүй хүнд тамхи худалдах, түүгээр тамхи худалдуулах, тамхийг ширхэглэн, дүнсэн болон түүнтэй адилтгах задгай тамхины үйлдвэрлэсэн боодлыг задалж буюу ороож худалдах, тамхины автомат машин ажиллуулах, хайрцаг, сав, баглаа боодол дээр онцгой албан татварын тэмдэг, үйлдвэрлэсэн улс, он, сар, үйлдвэр, импортлогчийн нэр, Монгол Улсад худалдахыг зөвшөөрсөн тухай тэмдэглэлгүй бол Монгол Улсын нутаг дэвсгэрт үйлдвэрлэх, худалдах, импортлох, экспортлохыг хориглох, тамхинд агуулагдах бохь, никотин, бусад хорт бодисын зөвшөөрөгдөх дээд хэмжээний стандартыг тогтоох зэрэг эрх зүйн орчныг бүрдүүлж өгсөн.

Бүх төрлийн нийтийн тээврийн хэрэгсэл, агаарын хөлөг, зорчигч тээврийн галт тэрэг, нийтийн хоол, худалдаа, баар, цэнгээний газар, аж ахуйн нэгж, байгууллагын ажлын байрны дотоод орчин, цэцэрлэг, бүх шатны сургууль, сургуулийн дотуур байр, тэдгээрийн гаднах орчин, нийтийн зориулалттай орон сууцны байшингийн орц, цахилгаан шат, хүүхдийн тоглоомын талбай, цэцэрлэгт хүрээлэн, зорчигч тээврийн буудал, зочид буудлын нийтийн танхим, тамхи татахыг хориглосон өрөө зэрэг газарт утаат тамхи татахыг хориглосон.

өа

Утаат тамхины хэрэглээ, дам тамхидалтаас хүн амын эрүүл мэндийг хамгаалах, тамхидалтыг багасгах, тамхинаас үүдэлтэй уршигт үр дагаврыг бууруулах чухал ач холбогдол бүхий зорилтыг дээрх нэмэлт өөрчлөлт агуулсан боловч утаат тамхи татах далд өрөө, газар бий болох, ахуйн хүрээнд татах, утаат тамхинаас үүсэх хог хаягдал, орчны бохирдол байсаар байгаа нь хуулийн хэрэгжилтэд сөргөөр нөлөөлсөөр байна. Энэ хуулийн төсөл нь Тамхины хяналтын тухай хуулийн хэрэгжилтийг амьдралд нийцүүлж сайжруулах, эрх зүйн орчинг илүү тодорхой болгон хүн амын эрүүл мэндийг орчны хог хаягдал, бохирдол, дам тамхидалтаас хамгаалах ач холбогдолтой гэж үзлээ” хэмээн төсөл санаачлагач тайлбарласан юм.  Тиймээс Утаат тамхи татах зөвшөөрөгдсөн цэгийг тодорхойлж, байгуулах стандарт болон анхааруулах тэмдгийн талаар тусгасан байна. Нийтийн хоол, худалдаа, баар, цэнгээний газар, аж ахуйн нэгж, байгууллагын ажлын байрны дотоод орчин болон нийтийн эдэлбэр газарт тамхи татах зөвшөөрөгдсөн цэг байгуулж болохоор зохицуулжээ.  Нийтийн эдэлбэр газарт байгуулах зөвшөөрөгдсөн цэгийн байршил, төсвийг сум, дүүргийн Иргэдийн Төлөөлөгчдийн Хурал, хэрэв аж ахуйн нэгж, байгууллага байгуулах бол тухайн этгээд хариуцахаар тусгасан байна.

өа

Хуулийн төсөлтэй холбогдуулан гишүүд асуулт тавьж, саналаа хэлсэн юм. УИХ-ын гишүүн С.Баярцогт “Тамхи татаж болохгүй тусгай цэгийг хуульд нэрлэж заая, Тухайлбал, Төрийн ордонд тамхи татахгүй байхаар хуульчилъя.” гэсэн юм.  Үүнд гишүүн Д.Эрдэнэбат “Ордонд тамхи татахгүй гэсэн хууль байгаа ч Төрийн ордонд нэг ч хүн тамхи татаагүй гэдэг нь эргэлзээтэй” гэлээ. УИХ-ын гишүүн Л.Эрдэнэчимэг “Бид тамхины хяналтын тухай хууль батлан гаргаж хэрэгжүүлж байна. Өнөөдөр ресторан, баар тамхигүй орчин болсон. Харин тамхи татдаг ганц газар бол Төрийн ордон. Танай өрөө өнөөдөр тамхины албан бус цэг болсон.  Та өөртөө зориулж хууль өргөн барьж байна” хэмээлээ. Харин гишүүн Д.Эрдэнэбат “Би Л.Эрдэнэчимэг гишүүний бухимдлыг ойлгож байна. Ямар хууль санаачлах нь гишүүний бүрэн эрх. Харин өнөөдөр тамхи татдаг нийгмийн хэсэг байгаа. Тэндэд тамхи татах цэгийг нь байгуулж өгөх хэрэгтэй. Би тамхи татдаг. Харин тамхи татсаныхаа төлөө нийгэмд адлагдаж болохгүй” гэсэн юм. Мөн гишүүн Г.Баярсайхан “Монгол хүний эрүүл мэнд талаас нь бодолцъё. Та АН-ын бүлгийн дарга байсан. Одоо Аж үйлдвэрийн сайдаар томилогдсон. Тиймээс та зангарагтай байх хэрэгтэй” гэлээ. Гишүүн Л.Болд “Хүний эрүүл мэндэд тамхи маш хортой. Би үүнийг амьдралаараа мэддэг.  Өөрөө татдаггүй ч гэсэн бусад хүмүүс татдаг. Дам тамхидалтын улмаар тоосонцор үүсч, ханиалгадаг болсон” гэсэн юм.

өа

Харин Н.Энхболд “Тамхи татдаг л бол муу хүн гэж ойлгохгүй байна. Монголын хүн амын 30-40 хувь нь ямар нэг хэмжээгээр тамхи татаж байгаа. Тэднийг тамхи татдаг гэсэн үүднээс эрх ашгийг нь боомилж болохгүй. Огцом шийдээд амжилтад хүрсэн зүйл байдаггүй” гэлээ.

өа

Чуулганы нэгдсэн хуралдаан үргэлжилж байна.

өа

Н.Энх