Австралийн Ерөнхий сайд Тони Эббот өчигдөр Японы Ерөнхий сайд Шинзо Абетэй утсаар ярьсан тухай “www.nhk.or.jp” мэдээллээ. Эббот хэт даврагчдад барьцаалагдсан Япон иргэдийг суллах ажиллагаанд туслалцаа үзүүлж, “Халифын вант улс” бүлэглэлийг устгах ажиллагаанд хамтрахыг Абегээс хүсчээ. Тэрбээр “Хэт даврагчдад барьцаалагдаад буй иргэдийг суллах ажиллагаанд Австрали улс нэгдэхээ мэдэгдэж байна. Өнөөдөр хэт даврагчид хүчтэй байж болно. Тэд барьцааны иргэдээр дамжуулан нэг улсыг дарамталж болно. Тэгэхдээ бид тэдэнд дийлдэж болохгүй. Хамгийн гол нь барьцааны иргэдийг аврах. Хэт даврагчид улс төрийн шалтгаанаар хүн барьцаалахаа зогсоо. Өнгөрсөн он АНУ, Их Британийн зургаан иргэн амиа алдсан” гэж хэлжээ. Австралиас гадна Их Британийн Ерөнхий сайд Дэвид Камерон барьцаалагчдын шаардаж буй мөнгөнд туслалцаа үзүүлэхээ мэдэгдсэн байна. Абе иргэдээ аварсны дараа Иракт цохилт өгөхөө мэдэгдээд буй юм.

“NHK”агентлагт барьцааны иргэн Кенжи Готогийн дүү ярилцлага өгчээ. Тэрбээр “Ерөнхий сайд Шинзо Абе ахыг минь авраач. Та бол манай гэр бүлийн эцсийн найдвар” гэж хэлжээ. “Барьцааны иргэдийг аврах цаг Токиогийн цагаар өнөөдөр 14.50 цагт дуусна” гэж “Ройтерс” агентлаг мэдээлэв.

Б.Дэлгэрцэцэг