Ч.Сайханбилэгийн Засгийн газар байгуулагдаад нэг улирал ч болоогүй энэ үед гишүүнийг нь огцруулах шаардлага спикерт өргөн баригдаж, УИХ-аар хэлэлцэж эхэллээ. Засгийн газрын танхимын гишүүдийг батлахад хамгийн их шүүмжлэлд өртөж байсан эрхэм бол С.Баярцогт. Тэрбээр Оюутолгойн гэрээ хэлэлцээрийг Монголд ашиггүй хийсэн, улсаа өрөнд унагасан, гадаад дахь оффшор дансаа тас нуусан, мэдлэг, чадвараа төрд бус хувийн ашиг сонирхолдоо зориулдаг, төрийн түшээ биш тушаа гээд шүүмжлэл дагалдан, “муу нэр луу данстай” гишүүдийн тоонд багтдаг. Дээр нь Н.Алтанхуягийн Засгийн газрыг огцруулахад голлох үүрэг гүйцэтгэж, дараагийн Ерөнхий сайдаар найзыгаа томилуулахад онцгой үүрэгтэй оролцсон гээд өнгөцхөн жишээлэхэд түүний талаар “баар”-тай мэдээллүүд үргэлжилдэг. Өнгөрсөн баасан гаригт УИХ-ын нэр бүхий гишүүд ЗГХЭГ-ын дарга С.Баярцогтыг огцруулах саналыг УИХ-д өргөн барьсан. Тэд огцруулах үндэслэлдээ “Монгол Улсын 2015 оны Төсвийн тухай хуульд нэмэлт, өөрчлөлт оруулж, тодотгол хийх үеэр Засгийн газрын Хэрэг эрхлэх газрын дарга С.Баярцогтын гарын үсэг бүхий “Эрдэнэс Оюу толгой” ТӨК-д хуулийн зөвлөгөө авах нэрийдлээр АНУ-ын “Painter Law Firm” нэртэй, гэр бүлийн хоёрхон гишүүнтэй компанитай гэрээ хийж 17 тэрбум, 500 сая төгрөгийг шилжүүлсэн байна” гэсэн.
Харин шинэ долоо хоногт УИХ дахь МАН-ын бүлэг ээлжит хуралдаанаараа ЗГХЭГ-ын дарга С.Баярцогтыг огцруулах шаардлагагүй гэсэн байр суурьт нэгдсэн бол Засгийн газрын хэвлэл мэдээлэл олон нийттэй харилцах албанаас мэдэгдэл гаргасан байна лээ. Уг мэдэгдэлд “Нэр бүхий гишүүдийн өргөн барьсан ЗГХЭГ-ын дарга С.Баярцогтыг огцруулах үндэслэл нь “бодит байдалд огт нийцээгүй, гүтгэлэг, гүжирдлэгийн шинжтэй байх бөгөөд үүнийг Засгийн газрын гишүүний нэр төр, ажил хэргийн нэр хүндийг санаатайгаар гутаах гэсэн зүй бус, явуургүй арга гэж үзэж байна” гээд Монгол Улсын 2015 оны төсвийн тодотголын 3 дугаар хавсралтаар баталсан “Төсвөөс эргэн төлөгдөх нөхцөлтэй санхүүжүүлэх хөрөнгө оруулалтын төсөл, арга хэмжээ, барилга байгууламжийн нэмэлт”-ийн IV.183 дугаарт заасан “Эрдэнэс оюу толгой” 17500.0 сая төгрөг нь Оюутолгой төслийн санхүүжилтийн үр ашигтай байдлыг хангах, төслийн бүтээн байгуулалтыг хэрэгжүүлэхэд шаардлагатай стратеги, санхүү, хууль болон олон нийттэй харилцах зөвлөх үйлчилгээнд шаардагдах хөрөнгө бөгөөд энэхүү зөвлөх үйлчилгээний зардлын асуудлыг Засгийн газрын 2014 оны 8 дугаар сарын 28-ны өдрийн 274 дүгээр тогтоолоор, зөвлөх авч ажиллуулах асуудлыг “Оюутолгой төслийн зөвлөх үйлчилгээний тухай” Ерөнхий сайдын 2013 оны 2 дугаар сарын 4-ний өдрийн 28 дугаар захирамжаар тус тус шийдвэрлэсэн байна” гэдгийг онцолжээ.
Үйл явдал гэнэт өрнөж найз Ерөнхий сайдыг нь явсан хойгуур түүнийг огцруулах асуудал яригдаж буйд С.Баярцогт ч багагүй сандарч буй бололтой. Өөрийг нь огцруулах шаардлага өргөн барьсантай зэрэгцээд амралтын өдрүүдэд С.Баярцогт зарим хүмүүстэй зангиагүй уулзалт зохион байгуулж “амрах завгүй ажилласан” сураг чих дэлсэж байсан.
Ямартай ч ЗХЭГ-ын даргыг огцруулах саналыг өнөөдөр Төрийн байгуулалтын байнгын хорооны хуралдаанаар хэлэлцэнэ. Хамтарсан Засгийн газарт багтсан улс төрийн хүчнүүд ажлын үр дүнг нь ч үзээгүй байж сайд нарыг огцруулах асуудлыг дэмжихгүй л болов уу гэж ажиглагчид хэлж байна лээ.
Н.Сонор