Монгол Улсын Ерөнхийлөгч, Зэвсэгт хүчний ерөнхий командлагч Ц.Элбэгдорж Батлан хамгаалах асуудал эрхэлсэн төрийн захиргааны төв байгууллага Цэргийн хэргийг бүгд захиран шийтгэгч яам буюу өнөөгийн Батлан хамгаалах яам байгуулагдсаны 100 жилийн ойг тохиолдуулан Монгол Улсын батлан хамгаалах салбарын хөгжил дэвшил, Зэвсэгт хүчний шинэчлэлд үнэтэй хувь нэмэр оруулсан УИХ, Засгийн газрын гишүүн, Батлан хамгаалахын сайд Л.Болдыг Цэргийн гавъяаны улаан тугийн одонгоор шагнажээ.
Л.Болд 2008 онд Батлан хамгаалахын сайдаар томилогдсоноосоо хойш Зэвсэгт хүчний бодлогод дорвитой шинэчлэл хийж, Монгол Улсынхаа батлан хамгаалах салбарыг гадаадын олон улс оронтой сайн түншлэлийн харилцаанд оруулан ажиллаж байгаа. Сайд Л.Болдын санаачилгаар цэрэг армийн нэр хүндийг өндөрт өргөсөн “Тусгай салаа” телевизийн олон ангит кино, “Тусгай салаа-2” бүрэн хэмжээний уран сайхны кино, “Догшин хар сүлдний нууц” хэмээх монгол цэргийн тухай түүхэн баримтат кинонууд бүтээгдсэн.
УИХ, Засгийн газрын гишүүн, Батлан хамгаалахын сайд Л.Болд яамныхаа 100 жилийн ойн баяр, шинэ жилийн цэнгүүн дээр төрийн өндөр дээд шагнал хүртсэндээ талархан үг хэлэхдээ, Монгол Улсын тусгаар тогтнол, ард түмнийхээ төлөө сайн сайхны төлөө зүтгэсэн Монгол цэргийн гавъяаг түүх хэзээ ч мартахгүйг дурдан, Монгол Улсын батлан хамгаалах салбар, Зэвсэгт хүчний хөгжил дэвшлийн төлөө зүтгэхээ амлалаа. Ирж буй 2012 онд Их Монгол Улсыг үндэслэн байгуулсан монголчуудын оюун санааны эцэг болсон эзэн богд Чингэс хааны мэндэлсэний 850 жилийн түүхэн их тохиох бөгөөд эл ойд зориулан Монгол цэргийн түүхэн хөгжил, дэлхийн цэргийн урлагт оруулсан хувь нэмрийг өгүүлсэн Чингис хааны цэргийн тухай 130 ангит кино төслийг хэрэгжүүлэх болсноо сайд Л.Болд хэлжээ.