МАН-ын бүлэг Боловсролын тухай багц хуулийн төслийг хэлэлцлээ. Оны өмнөхөн багш нар цалингаа нэмүүлэхийг шаардаж ажил хаясан. Тэдэнтэй Хөдөлмөр, нийгмийн гурван талт хэлэлцээний дагуу зөвшилцөж, хууль эрх зүйн орчинг өөрчлөхөөр тохиролцоонд хүрсэн. Энэ дагуу УИХ боловсролын салбарыг бүхэлд нь шинэчлэх хуулийн төслүүдийг хэлэлцэж эхэллээ. Сургуулийн захирал, сургалтын менежер, нийгмийн ажилтан, сургуулийн эмч, номын санч, хичээлийн эрхлэгч, цэцэрлэгийн эрхлэгч нарт таван жил тутамд зургаан сарын цалинтай тэнцэх хэмжээний тэтгэмж олгох, боловсролын ажилтнуудыг таван жил тутамд эрүүл мэндийн үзлэгт нэг удаа үнэ төлбөргүй хамруулах, таван жил тутамд мэргэжил дээшлүүлэх сургалтад хамруулахаар хуулийн төсөлд тусгасан. Мөн сургууль, цэцэрлэгийн хичээлийн байрны газрыг хэн нэгэнд хувьчлахгүй, сургууль, цэцэрлэгт нь өмчлүүлэхээр заажээ. Сумын сургуулийн захирал, цэцэрлэгийн эрхчлэгчийг сумын Засаг дарга томилдог байсныг аймгийн Засаг дарга томилдог болохоор өөрчлөх аж. Хүүхдийн дүрэмт хувцсыг улс даяар нэгэн жигд болгож, зардлыг нь улсаас хариуцах зэрэг олон өөрчлөлтийг тусгасан байна. Энэ бүгдийг нэг мөр болгож боловсролын салбарыг бүхэлд нь өөрчлөх асуудлыг судлах ажлын хэсгийг МАН-ын бүлэг байгуулсан байна.
Харин олонхийн бүлэг Эхэд урамшуулал олгох тухай хуулийн төслийг өмнө нь дэмжсэн. Тэд байр сууриа хадгалж байгаа бөгөөд энэ хуулийн төсөл сонгуультай холбоогүй гэдгийг бүлгийн дарга Ө.Энхтүвшин онцоллоо.