Говь-Алтай аймгийн Засаг дарга О.Амгаланбаатар цэвэр усны савны шошго дээр өөрийнхөө зургийг хэвлэж, иргэддээ тараасан нь хууль зөрчсөн үйлдэл гэдгийг АТГ-аас сануулжээ. АТГ-аас Засгийн газрын Хэрэг эрхлэх газрын дарга С.Баярцогт, Говь-Алтай аймгийн ИТХ-ын дарга А.Дэлгэржаргал нарт албан бичиг хүргүүлж, Засаг дарга О.Амгаланбаатар нь ашиг сонирхлын хууль зөрчсөн учир арга хэмжээ авахыг хүссэн байна. Энэ дагуу Говь-Алтай аймгийн Засаг дарга О.Амгаланбаатарт улс, орон нутгийн өмчийн хөрөнгөөр хийгдэж байгаа ажил, үйлчилгээгээр дамжуулан өөрийн сурталчилгаа хийхгүй байхыг сануулсан гэсэн албан хариуг Засгийн газрын Хэрэг эрхлэх газрын дэд дарга Ч.Сайнбилэг АТГ-д хүргүүлжээ.
ө
Говь-Алтай аймгийн Засаг дарга нь “Эрүүл ус” орон нутгийн өмчит аж ахуйн тооцоот үйлдвэрийн газарт үйлдвэрлэсэн цэвэр усны савны шошго дээр “Бидний Алтай хөтөлбөр-Алтай нутгийн ард түмнийг эрүүл, аюулгүй ундны усаар хангахад сэтгэл зүтгэл гарган ажиллав. Говь-Алтай аймгийн Ардчилсан намын дарга, аймгийн Засаг дарга О.Амгаланбаатар” гэсэн бичвэр бүхий өөрийн цээж зураг, гарын үсгийг хэвлэн тараагаад байгаа юм.
б
В.Бат
Уншиж байна |