"Зорчигч тээврийн нэгтгэл" ОНӨААТҮГ-ын ажилчид цалингаа 35-40 хувиар нэмэхийг шаардаж, биелүүлээгүй тохиолдолд маргааш ажил хаяхаа мэдэгдээд байгаа. Тэгвэл ажил олгогч, ажилчид, үйлдвэрчний эвлэлийнхэн тохиролцоонд хүрсэн эсэхийг "Зорчигч тээврийн нэгтгэл" ОНӨААТҮГ-ын дарга Ц.Одонтунгалагаас тодрууллаа. Тэрбээр "Бид тохиролцсон гэж ойлгож болно. Гэхдээ үйлдвэрчний эвлэлийн гурван даргын нэг нь тохиролцохыг хүсээгүй. Манай ажилчдын 70-80 хувь нь ажил хаях сонирхолгүй байгаа. Өмнө нь үйлдвэрчний эвлэлийн турхиралтаар ажил хаяад ажилчид хохирсон. Бид ч ажил хаяулахгүйн төлөө явна" гэсэн байр суурийг илэрхийлж байна. Мөн тэрбээр ажилчдынхаа нийт цалинг нэмэх боломжгүй учраас үндсэн цалинг нэмж буйгаа дуулгав. Ингэснээр жолоочийн 450 мянган төгрөгийн үндсэн цалин 550 мянган төгрөг болж нэмэгдэх аж. Харин кондукторын 350 мянган төгрөгийн үндсэн цалин 480 мянган төгрөг болно. Үүн дээр шагнал нэмэгдэхэд жолооч сард дундажаар 1.1 сая төгрөгийн цалин авна. Харин кондуктор дундажаар 800 мянган төгрөгөөр цалинжих аж.
ө
"Зорчигч тээврийн нэгтгэл" ОНӨААТҮГ нь 1700 орчим ажиллагсадтай аж. Уг нэгтгэлийн жолооч, кондуктор нарын 20-30 хувь нь сард 1.5 сая төгрөгийн цалин авдаг юм байна.
б
В.Бат
Уншиж байна |