“Хүний эрхийн талаар авах зарим арга хэмжээний тухай” Улсын Их Хурлын тогтоолын төслийн Хууль зүйн байнгын хороогоор хэлэлцээд дэмжсэн байна. Өнгөрсөн оны арванхоёрдугаар сарын 14-ний УИХ-ын чуулганаар уг тогтоолын төслийг хэлэлцэх үеэр төр ард түмнээсээ уучлал гуйх ёстой гэсэн заалтыг гишүүдийн олонхи хүлээн зөвшөөрөлгүй төслийг унагасан. Төслийг санаачлагч Х.Тэмүүжин, Ж.Энхбаяр нар өнөөдөр тогтоолын төслийг дахин танилцуулж хэлэлцүүлсэн юм.
Харин энэ удаа төр уучлал гуйх гэдэг заалтыг авч хаясан байв. Уг тогтоолын төсөлд хүний эрхийг хамгаалахад цагдаа, шүүхийн байгууллагын үүрэг хариуцлага, зохицуулалт алдагдсан. Хэрэг бүртгэгч нь мөрдөн байцаагчдаа бэлэг өгөөд сууж байдаг. Бэлэг сэлт ихээр урсаж байгаагийн цаана хүний эрх зөрчигдөж байна хэмээн төсөл санаачлагчид хэлж байв.
Зарим гишүүн Х.Тэмүүжин гишүүнийг хэт хатуудаад байна гэдгийг ч анхааруулсан. Ийнхүү багагүй маргаан үүссэний эцэст УИХ-ын тогтоолын төслийг дэмжиж УИХ-ын чуулганы хуралдаанд оруулах болсон юм.
Мөн дараа нь Эрүүгийн хуульд нэмэлт, өөрчлөлт оруулах хуулийг төслийг хэлэлцэх эсэхийг хэлэлцээд анхны хэлэлцүүлгийг чуулганы хуралдаанд оруулахыг дэмжлээ. Энэ нэмэлт, өөрчлөлтөөр төрийн өндөр дээд албан тушаалтан гэнэт хөрөнгөжсөн бол эрүүгийн хариуцлага хүлээх болж байна.