“Босоо хөх монгол” хөдөлгөөний залуус, дэмжигчид өнгөрсөн амралтын өдөр “Бурхан халдун”-д аялж явахдаа тэнд мөн л аялж, Бурхан халдун хайрханд сүслэн, залбирч явсан хэсэг залууст эр бяраа гаргасан талаарх видео бичлэг сошиал ертөнцөөр тарсан билээ. Тэгвэл өнөөдөр тэд энэ асуудалтай холбоотой хэвлэлийн хурал хийлээ.
Хуралд “Босоо хөх монгол” бүлгэмийн тэргүүн П.Шинжээравдан, тус бүлгэмийн Удирдах зөвлөлийн гишүүн Э.Төмөрхуяг, Х.Бээжин нар оролцлоо. Энэ үер тэд “Эх орон газар шорооныхоо төлөө тэмцээд ирэхэд “дайсан” олон болдог юм байна. Уг нь бид тэдгээр өвөрмонголчуудад эр бяраа гаргаж, дарамтлаагүй. Та бүхэн итгэхгүй бол тэдгээр өвөрмонголчуудыг дагуулаад явж байсан н.Мэндсайхан гэгч залуутай яг одоо утсаар холбогдож болсон явдлыг яриулъя” гэв.
Ийнхүү хэвлэлийн хурлын үеэр иргэн н.Мэндсайхантай утсаар холбогдож дараах тайлбарыг сэтгүүлчдэд сонсгосон юм. Мэндсайхан “Би өнгөрсөн амралтын өдөр дөрвөн Өвөрмонголыг дагуулаад Бурханхалдун ууланд очсон юм. Тэр хэдийг түрүүлж алхуулчихаад араас нь гарч ирсэн. Тэгэхэд “Босоо хөх монгол”-ынхон хятадууд байна гэж ойлгоод сөхрүүлээд суулгачихсан байсан. Би учрыг нь араас нь очоод учрыг нь тайлбарлаад “Өвөрмонголчууд байгаа юм” гэхэд “Босоо хөх монгол”-ынхон “За, уучлаарай. Өвөрмонголчууд гэдэг чинь монгол гэсэн үг” гээд уучлал гуйгаад өнгөрсөн. Хэвлэл мэдээллээр гараад байгаа шиг ямар ч дарамт шахалт болоогүй. Яагаад ийм худлаа мэдээлэл тараад байгааг би гайхаж байна. Ямар ч зодож, цохисон юм байхгүй” гэсэн юм.
Түүнчлэн, хэвлэлийн хурлын үеэр “Босоо хөх монгол” бүлгэмийн тэргүүн П.Шинжээравдан УИХ-ын дарга З.Энхболд, УИХ-ын гишүүн М.Зоригт, УИХ-ын гишүүн Л.Эрдэнэчимэг, Сүхбаатар аймгийн Засаг дарга Батсуурь, “Ногоон хас” хөдөлгөөний тэргүүн Бямбадорж нарыг шүүхэд өгч байгаагаа мэдэгдлээ.
Учир нь эдгээр нэр бүхий хүмүүс ямар ч баримт нотолгоогүй “Босоо хөх монгол” хөдөлгөөнийхөнийг алтны нинжа, шантаажчин зэргээр олон нийтийн хэвлэл мэдээллээр удаа дараа мэдээлэл тараасан гэнэ. Иймд нэр төрөө сэргээлгэх үүднээс шүүхэд өгөхөөр болсон гэдгээ мэдэгдлээ.
Өнөөдөр буюу 2015.04.02-ны өдөр "Босоо Хөх Монгол" ТББ Зууны мэдээ мэдээллийн төвд цаг үеийн асуудлаар хэвлэлийн бага хурал хийлээ. Хурлын үеэр Бурхан халдун ууланд өвөр монголчуудтай хамт явсан Монгол залуутай утсаар холбогдож тайлбар авлаа.
Posted by Босоо Хөх Монгол Бүлгэм on Wednesday, April 1, 2015
Б.Дэжид