“Хөх Монгол” бүлэглэм өнгөрсөн долоо хоногт Бурхан Халдун ууланд гарах гэж байсан Хятадын жуулчдыг өвдөг сөгдүүлж буй бичлэгээ олон нийтийн сүлжээнд байршуулсан билээ. Хятадын төрийн мэдлийн “Синьхуа” агентлаг “Монголын удирдлагууд Хятад жуулчдаас уучлалт гуйв” гэх гарчигтай мэдээллийг нийтэлжээ.
Нийтлэгдсэн огноо: 2015 оны дөрөвдүгээр сарын 4.
Монголын нацист бүлэглэл гэгдэх “Хөх Монгол” бүлэглэл өнгөрсөн сарын 28-нд Хятадаас тус улсыг зорин ирсэн жуулчдын нэгийг өвдөг сөгдүүлэн, зэмлэж буй зургаа олон нийтийн сүлжээнд байршуулж, гутаан доромжилсон билээ. Энэ жуулчид Хэнтий аймгийн Бурхан халдун ууланд гарах гэж байхдаа тус бүлэглэлийн гишүүдэд баригдсан гэнэ. Энэхүү ууланд зөвхөн Монгол эрчүүд гарах ёстой аж. Тус улсын Ерөнхийлөгч Цахиагийн Элбэгдорж өнгөрсөн баасан гаригт “Хэт үндсэрхэг үзэл ямар хортой гэдгийг харуулсан хэрэг боллоо. Монгол бол олон улсад нээлттэй, найрсаг улс билээ” гэж мэдэгджээ.
Монголд жуулчлалаар ирсэн дээрх жуулчид энэ амралтын өдөр Хятад руу буцсан гэж Улаанбаатарт суугаа Хятадын элчин сайдын яамнаас мэдээллээ. Элчин сайдын яам иргэдээ хамгаалах зорилгоор цахим сайт, олон нийтийн сүлжээнд байршуулсан зургийг устгах сонирхолтой байгаа юм. “Монголын хэт даврагчдын үйлдэл нэг улсын нэр хүндэд ноцтой халдсан хэрэг боллоо” гэж “Синьхуа” агентлаг онцолжээ.
Улаанбаатар хотын дарга Э.Бат-Үүл өнгөрсөн пүрэв гаригт “Хөх Монгол” гэх хэт даврагчдын өмнөөс жуулчдаас уучлал гуйжээ. Тэрбээр “Би хэт даврагчдын өмнөөс албан ёсоор Хятадын жуулчдаас уучлалт гуйж байна” гэж хэлжээ. Э.Бат-Үүл хэт даврагчдын үйлдлийг буруутгаж, хариуцлага тооцохоо мэдэгдсэн байна.
Хотын даргын мэдэгдлийг Ерөнхийлөгч Ц.Элбэгдорж цаг үеэ олсон мэдэгдэл байна хэмээн сайшаасан юм. Хятадын Элчин сайдын яам иргэдийнх нь нэр болон гадаад төрхийг нь илчилсэн хэт даврагч “Хөх Монгол” бүлэглэлийг буруутгаж, гомдолтой байгаагаа илэрхийлжээ. Яамнаас тус улсад ажиллаж, амьдарч мөн жуулчлалаар ирсэн Хятад иргэдийн аюулгүй байдалд онцгой анхаарлаа хандуулахыг Монголын удирдлагуудаас хүсч, шаарджээ.
Сүүлийн үед тус улсын үндсэрхэг үзэлтэй залуус нэгдэж, Хятад болон гадаадын иргэдийг таагүй хүлээн авах болсон юм.
Б.Дэлгэрцэцэг