Ардчилсан намын гишүүд дэмжигчдийн холбооны тэргүүн Т.Хасбаатар Үндэсний мэдээллийн төвд хэвлэлийн хурал хийж, МАН-ыг АТГ-т өгч буйгаа мэдэгдэв.
Т.Хасбаатар өмнө нь МАН-ын байр болох Тусгаар тогтнолын ордонг барихад төсвөөс 11 тэрбум төгрөг гаргасан нь Үндсэн хууль болон бусад хууль тогтоомжийг зөрчсөн. Тиймээс татвар төлөгчдийн энэ мөнгийг буцааж авах асуудлаар УИХ болон Засгийн газар шаардлага хүргүүлсэн. Гэвч түүний шаардлагын хариу ирээгүй учраас энэ асуудлаараа АТГ-д хандахаар болсон гэнэ. Тэрбээр “Хотын төвдөө өндөр байшин сүндэрлүүлчихээд, түүнийгээ түрээсэлдэг МАН шиг ийм нам соёлт ертөнцөд алга” гээд дараах гомдлыг АТГ-д хүргүүлж буй дуулгав.
Т.Хасбаатар:
1. 2008 оны 7 дугаар сарын нэгний үймээнд МАН төв байраа шатаалган 14.6 тэрбум төгрөгөөр одоогийн Тусгаар тогтнолын ордонг барихдаа төрөөс татвар төлөгчдийн 11 тэрбум төгрөгийн хууль бусаар авсныг эргэн төлүүлэх талаар 2015 оны 3 дугаар сарын 11-ний өдөр УИХ, Засгийн газарт хандан АН-ын гишүүд дэмжигчдийн холбооны тэргүүний хувиар шаардлага хүргүүлсэн боловч хариу ирүүлээгүй тул АТГ-т албан ёсоор хандаж байна.
2. Тусгаар тогтнолын ордонг барихад улсын төсвөөс 11 тэрбум төгрөгийг МАН гаргуулж авсан нь Монгол Улсын Үндсэн хууль болон бусад олон хууль тогтоомжийг зөрчсөн улс төрийн авлигын шинжтэй үйлдэл хэмээн үзэж гомдол гаргаж байгаа тул хуулийн хугацаанд шалган тогтоож өгөхийг хүсье гэжээ.
Тэрбээр хэвлэлийн хурлын үеэр “МАН-ын Ерөнхий нарийн бичгийн дарга Ж.Мөнхбат бид хоёр зарим зүйл дээр санал нэгдэж байгаа. Би Тусгаар тогтнолын ордонг номын сан болгоё гэсэн. Харин Ж.Мөнхбат намуудын байрыг эмнэлэг болгох талаар ярьсан. Тэгэхээр бид хоёр энэ асуудалд нийгмийн талаасаа санал нэгтэй байгаа гэсэн үг. Тиймээс Ж.Мөнхбат залуу хүний хувьд надтай хамт суугаад энэ асуудлаар мэдэгдэл хийнэ гэж найдаж байна” хэмээн ярив.
Т.Хасбаатар хөдөө, орон нутаг дахь МАН-ын байруудыг мөн судалж байгаа гэнэ. Харин тэр АН-ын дөрвөн байрны талаар огт мэдэхгүй гэнэ. Тиймээс энэ асуултыг АН-ын удирдлагуудад тавихыг хүсэв.
В.Бат
Уншиж байна |