Монгол Улсын Ерөнхийлөгч Ц.Элбэгдорж УИХ-ын чуулганд тайлангаа тавилаа. Дараагаар нь гишүүдийн асуултад хариулж байна.
-Капла давж заалдаагүй, 35 тэрбум төгрөгийг төлөх ёстой-
УИХ-ын гишүүн Д.Дэмбэрэл:
-Эдийн засгийн хүндрэлээс гарах бодлогыг дэмжиж байна уу? Эдийн засгийг сэргээхэд аль салбарыг түлхүү дэмжиж байна.
-Эдийн засагтай холбогдсон асуудлаар би байр сууриа илэрхийлсэн. Хамгийн гол нь шинээр эхэлж, үйлдвэрлэл бий болгох хэрэгтэй. Том том орнууд эдийн засгийн хямралд ороод шинэ ажлын байр, технологио дэмжсэн байдаг юм билээ. Хөрөнгийн бирж, газартай холбоотой асуудлаа хурдан шийдэх хэрэгтэй. Газартай холбоотойгоор монгол хүн газраа хурдан өмчлөх хэрэгтэй. Төмөр зам, дамжин өнгөрөх тээвэр, өөрийн гэсэн шатахуунтай болох, цахилгаан станцуудаа барих хэрэгтэй.
УИХ-ын гишүүн Д.Лүндээжанцан:
-Ерөнхийлөгчийн тайланг анх удаа танхимд сонсож байна. Ерөнхийлөгч чамлахааргүй их ажил хийжээ гэж дүгнэлээ. Байр суурийг нь ч сонслоо. Манайх парламентын засаглалтай улс. Таны тайланд хөгжлийн тухай их гарлаа. Цаашид төр, засаглалын уялдаа, хөгжлийг хэрхэн харж байна вэ?
-Хөгжлийн асуудал Монгол чухал. Төрийг хариуцлагатай болгох хэрэгтэй. Аюулгүйн зөвлөлийн хүрээнд дэмжих шаардлагатай ажил байвал дэмжээд явна. Өнгөрсөн хугацааны байдлаас харахад Монгол Улс түүхэн уламжлал нь дагалдаад төрийн тэргүүн нь бүх зүйлийг хийдэг юм шиг иргэд нь ханддаг зүйл байна. Бид Үндсэн хуулиа өөрчилнө гэхээс жижиг зүйлийг л УИХ шийдчих хэрэгтэй. УИХ-ын гишүүн бүрийн өмнө микрофон байх шаардлагагүй. Индэр дээрээс л гишүүд байр сууриа ярьчих хэрэгтэй.
УИХ-ын гишүүн О.Содбилэг:
-Үндсэн хуульд өөрчлөлт оруулах асуудлаар та ямар байр суурьтай байна вэ?
-Үндсэн хуулийн 23 жилийн үйлчилгээг бид дүгнэх цаг болсон. Ард иргэдэд нээлттэй ярилцах хэрэгтэй. Дордуулсан 7 шийдвэрийн хувьд ч хэлэлцэх нь зүйтэй. Хуулийн байгууллагуудтай холбоотой асуудал гарч ирж байгаа. Эрүүгийн байцаан шийтгэх, мөрдөх албаны хуультай холбоотой хууль батлагдаагүй. Энэ хуулиуддаа бид Монголынхоо жишигт нийцүүлээд сайн шийдэл олох юм бол зөв гарцаа олно.
УИХ-ын гишүүн Ө.Энхтүвшин:
-Капла нарыг уучилсан. Гэтэл тэд дахин давж заалдах төлөх 35 тэрбум төгрөгийг хүчингүй болголоо гэж байна. Энэ талаар тайлбараа хэлэхгүй юу?
-Капла нарын улс шүүхэд давж заалдаагүй. Ялтан уучлал гуйсан. Тэр ялыг уучилсан. Аж ахуйн нэгж нь 35 тэрбум төгрөг төлөх шүүхийн шийдвэр гаргасан. Давж заалдах шатны шүүх нь 35 тэрбум төгрөгөө төлүүлнэ гэдэг шийдвэр гаргуулсан.
УИХ-ын гишүүн З.Баянсэлэнгэ:
-Ерөнхийлөгчийн хийсэн ажлыг жингийн туухай дээр тавьбал хараасаа цагаан нь их байна гэж байна. Орон нутгийн ой болоход шагнал олноороо тараагдаж байна. Ерөнхийлөгчийн сонгууль хэр шударга явагдсан гэж үзэж байна. Монголд эв нэгдэл алга. Дээр нь намуудыг хагаран бутаргаж байна. Амьдралгүй юм ярьж болохгүй.
-Төрийн шагналтай холбоотой асуудал дээр өөрчлөлт хийе гэж байгаа. Намуудаас төлөөлөл орсон. Үүн дээр З.Баянсэлэнгэ гишүүн орсон. Дэмжсэн гэж бодож байгаа. Төрийн шагнал дээр гомдоллосон зүйл байдаг. Нэртэй устай нь гаргаад ирвэл Тамгын газарт өгч хэлэлцэж болох юм. Шүүхийн давж заалдах шатны шүүхийг давж заалдаагүй бол тэр эцсийн шийдвэр. Н.Энхбаяр Ерөнхийлөгчтэй холбоотой зүйл ярьж байх шиг байна. Тэр хүн уучлалаа хүсээд, Монгол Улсдаа ирж очоод явж байгаа. Энхтуяа, Хуяг гээд хүний асуудал байгаа. Монголд байхгүй, гадаадад явж байна. Холбогдох асуудлаа шийдүүлээд явах хэрэгтэй. Ноён уултай холбоотой асуудлаар Төрийн ордны гадаа хоол унд идэхгүй гэж явж байхаар эрмитаж дээр нь очоод нэхвэл зүгээр байх.
УИХ-ын гишүүн Л.Эрдэнэчимэг:
-Тавантолгой бол Монголын 3 сая хувьцаа эзэмшдэг цорын ганц баялаг. Тавантолгойн хэлэлцээрээр үндэсний аюулгүй байдалд нөлөөлөх зүйлүүд ч орсныг УИХ-ын дарга хаврын чуулганы нээлт дээр хэлсэн.
-Асуудлаа шийдэх шийдэх түвшинд нь яриад явчихвал хэрэгтэй. Тавантолгойн хэлэлцээр улстөрчдийн "хоолоо хийдэг” хэрүүл битгий болчихоосой гэж бодож байна. Аюулгүйн байдлын зөвлөл дээр тогтоол шийдвэрийг тусад нь зааж өгсөн. Тавантолгойн хэлэлцээг УИХ-аар хэлэлцүүлэхэд та бүхэн өөрсдийн байр суурь, саналаа сайн хэлэх хэрэгтэй. 2014 оны дүнгээр хамгийн их хөрөнгө оруулалт хийсэн улс Голланд байна лээ. Монголын эдийн засаг агшиж, багасаад байвал ард түмний амьдрал л хэцүүднэ. Ажлыг хийлгэдэг байх хэрэгтэй. Энэ асуудал хойшлоод дахин шийдвэрлэгдэхээр болоход өнөөдрийн түвшингээсээ хөрөнгө оруулалт нь багассан байж ч мэдэх шүү.
Н.Энх