Холливуудын нэрт жүжигчин Вин Дизелийн Британийн “www.telegraph.co.uk” сайтад өгсөн ярилцлагыг хүргэж байна. Тэрбээр сүүлд “Галзуу хурд 7” кинонд тоглосон билээ.

-Дахин уулзах таатай байна. “Галзуу хурд” киноны шинэ анги Америк гэлтгүй олон улсын кино чартуудад тэргүүлж, олон сая хүний хүлээлтийн зангилааг тайлж байна?

-Шинэ уран бүтээлээрээ үзэгчидтэйгээ уулзаж, сэтгүүлч гэлтгүй үзэгчдийн хувьд гол хүн болох уран бүтээлчдийн мөрөөдөл. Вин Дизель гэх нэр бүх сонин, хэвлэлээр их бичигдэж байгаад таатай байна. Кино минь амжилттай болсон эсэхийг мэдэхийг хүсвэл өнөөдөр худалдаанд гарч буй сонин, сэтгүүлийн эхний хуудсыг нээж үзэхэд хангалттай байдаг. Мөн энтертаймент сувгууд дээр сувгаа тааруулаад хэсэг ажигладаг. Мэдээж хэрэг тоглосон киноны тухай тэр тусмаа миний нэрийг дурьдахад би инээж, өөрөөрөө болон хамт олноороо бахархдаг. Бидний эхлүүлсэн ажил амжилт оллоо гэх үгс яг л азын сугалаа хожсон мэт сайхан сэтгэгдэл төрдөг.

-Сүүлийн үед хэвлэлүүд “Галзуу хурд” гэх мэт хэдхэн киноны тухай ярьж, бичиж байна. Ер нь сайн мэдээ гэхээсээ илүү сөрөг мэдээлэл хүрээгээ тэлэх үед уран бүтээлчийн хувьд киногоо өмөөрч, үзэл бодлоо илэрхийлэх үе цөөнгүй биз?

-Галзуу хурд бол галзуу хурд. Та хэдэн ч доллароор энэхүү киноны тасалбарыг худалдан авсан ч харамсахгүй. “Галзуу хурд” танд жинхэнэ утгаар нь гайхалтай мэдрэмж өгөх болно. Энэ киног амжилттай явж буй нь чадварлаг уран бүтээлчдээс гадна хэзээ ч давтагдашгүй зохиол болон гайхалтай багийн ажиллагаа. Би энэ кинонд тоглосон цагаасаа “Галзуу хурд”-ыг муулсан хүнтэй тааралдсангүй. “Галзуу хурд” кино хийгдэх ажиллагаанд оролцсон бүх хүн нэг гэр бүл. Бид нэг баг, нэг гэр бүл болж ажилласан.

-Тэгэхээр та “Галзуу хурд” кино ямар ч өөгүй өндөг шиг кино гэсэн үг үү?

-Яагаад ингэж хэлж болохгүй гэж. Би болон бүх хүн энэ киног төгс болгохын тулд бүхий л хүчээ дайчилсан. Би гэр бүлдээ зарцуулах бүх цаг хугацаа, хүчээ энэ уран бүтээлийн төлөө зарцуулсан. Би тоглосон бүх уран бүтээлдээ хайртай. Тэд бол миний хүүхдүүд шиг үнэ цэнэтэй зүйлс. Миний амьдрал ямар ч утга учиргүй өнгөрөөгүй гэдгийг батлах жинхэнэ баталгаа гэхэд болно. Миний залуу нас тэр кинонуудтай хамт өнгөрсөн. Би 70, 80 хүрээд өөрийгөө 30, 40 настай байхдаа ямар залуу байснаа тэр кинонуудаасаа харах болно. Бүх хүнд ийм гайхалтай хувь тохиохгүй. Миний бахархал, нэр төрийн баталгаа бол тоглосон бүх уран бүтээл минь. Би 19 настай байхдаа анхныхаа дүрийг бүтээж байлаа. Өнгөрсөн үеэ мартахыг хүсдэг олон хүн бий. Гэхдээ би өнгөрсөн үедээ хайртай цөөхөн хүмүүсийн нэг.

-“Галзуу хурд” киноны гол дүр Пол Уолкер гэнэтийн ослоор харамсалтайгаар амиа алдсан. Түүнийг амиа алдлаа гэх мэдээллийн дараа зураг авалт яах бол, зогсох болов уу гэх мэдээлэл хүмүүсийн дунд бий болж, хүлээлт үүсгэсэн. Полгүйгээр бүтсэн уран бүтээлийн тухай?

-Их хэцүү. Ээ бурхан минь юу гэж хэлэхээ сайн мэдэхгүй байна. Нэг л өдөр амьдрал минь зогссон мэт санагдсан. Бүх уран бүтээлч цочирдож, кино багийнхан ослоор хүлүүлсэн мэт зогсчихсон байсан. Зураг авалтын талбайд хэсэг хугацаанд цастай хүйтэн салхи үлээж байлаа. Бидний зүрх яг л Полынх шиг зогссон. Түүний төлөө бид дахин нэгдэж, уран бүтээлээрээ түүнийг дахин амьдруулахыг хүссэн. Жүжигчин хүн дэлгэцэнд бас бодит амьдрал дээр үхдэг. Найз минь бодит амьдралд байхгүй ч дэлгэцэнд үүрд амьд байх болно. Тэрээр амиа алдахаасаа өмнө ихэнх хэсэгт тоглоод амжсан. Тиймээс кино бүтэх явц хүндрэлгүйгээр төгссөн. Түүнтэй усны дусал шиг адилхан хоёр дүү нь биднийг дахин инээхэд тусалсан. Би нэг хэсэг Полыг амиа алдсан гэдгийг мартсан байсан. Пол миний хувьд юугаар ч сольшгүй анд нөхөр минь. Чамтай диваажинд учрахаас өөр дахин уулзах боломжгүй болсондоо харамсч байна.

-Кино нээлтээ хийгээд, кино үзэж байсан үзэгчид Полын хэсгийг үзэж байхдаа нулимсаа барьж дийлээгүй?

-Тиймээ. Надад ч гэсэн ийм зүйл тохиолдсон. Үнэхээр хэцүү байна. Чамайг мартахыг хүссэн ч чадахгүйнээ анд минь. Ямар их уй гашуу вэ. Энэ их шаналлыг мартахын тулд хэр их хугацааг зарцуулахаа ч мэдэхгүй байна.

-Таны эхнэр Палома Жиминез өнгөрсөн сарын сүүлээр амаржиж, хөөрхөн охинтой болсон. Та охиноо хэзээ ч мартахыг хүсэхгүй байгаа Пол Уолкерийн нэрийг өгсөн. Паулина гэж охиноо нэрлэсэн?

-Тиймээ. Түүнийг өдөр бүр дурсах энгийн бөгөөд эгэл арга. Анд минь чиний нэрийг миний гэр бүл хэзээ ч мартахгүй.

-Таныг сүүлийн үед хэвлэлийнхэн болон Полын фэнүүд нэр хүндээ өсгөх нэрийдлээр түүний нэрийг ашиглаж байна гэж буруутгаж байгаа. Бодит амьдрал дээр та хоёрыг тийм ч сайн найзууд байгаагүй гэж ярьдаг?

-Юу гэж бодох нь надад ямар ч хамаагүй. Би юу хүсч, би юу гэж бодно энэ бол миний эрх гэж бодож байна. Андаа дурссан нэгний сэтгэл рүү хүйтэн ус цацахгүй байхыг хүсье. Биднийг нөхөрлөл үүрд бат бөх байх болно.

-Энэ ярилцлагыг уншсан бүхэн Вин Дизелийг ганцхан найзтай гэж андуурч магадгүй?

-Найз олон. Гэхдээ Пол бол миний түшиг тулгуур. Би түүнээс мөнгө зээлж, байшин, машин авахуулж байгаагүй. Хамтдаа олон өдөр дараалж архи ууж, шоудаж үзээгүй. Хэрвээ энэ бүхнийг нөхөрлөл гэвэл бидний нөхөрлөлд ийм зүйл огт байгаагүй. Зүгээр л амьд байхдаа миний төлөө ямар их зүйл хийснийг байхгүй болсны дараа мэдэхэд зүрх урагдах шиг болсон. Ингээд л боллоо. Өөр зүйл ярихыг хүсэхгүй байна. Одоо хангалттай.

-“Галзуу хурд” үргэлжлэх үү?

-Магадгүй л юм. Би найруулагч биш зөвхөн жүжигчин.

Б.Дэлгэрцэцэг