“Буу шалгуулаад дууслаа”,  “Кремлийн хонх цохиж байна”, “Ялалтын туг заллаа”, “Номхон” ийнхүү эх орны дайны 70 жилийн ойн баярын парадад Москвагийн Улаанталбайд алхах монгол цэргүүд жагсаалын бэлтгэл хийж байна.  

Цоо шинэ парад хувцсаар жигдэрч, Батлан хамгаалах их сургуулийн урд талын талбайд хайрцаглан жагссан монгол цэргийн бүрэлдэхүүн жавхаалаг, сүрлэг.

Өнөөдөр Монгол Улсаа  төлөөлөн ялалтын баярын жагсаалд алхах тэдний бэлтгэлийн явцтай Ерөнхийлөгчийн Тамгын газрын дарга П.Цагаан, Батлан хамгаалахын сайд Ц.Цолмон, Гадаад хэргийн сайд Л.Пүрэвсүрэн нарын албаны хүмүүс танилцлаа.

Энэ үеэр Гадаад хэргийн сайд Л.Пүрэвсүрэн  “Эх орны дайны ялалтын баярын ёслолын жагсаалд Монгол Улсын Зэвсэгт хүчин анх удаа уригдан оролцох гэж байна. Манай цэргүүдийн бэлтгэл сайн байна. Анх удаа оролцож байгаа болохоор хариуцлагатай байх хэрэгтэй. Монголын цэргүүдийн урьсан нь манай улсын эх орны дайнд оруулсан хувь нэмрийг үнэлж, монгол цэргийг хүндэтгэж буйгийн илрэл хэмээн үзэж байна” гэж ярьсан.

Эх орны дайны ялалтын 70 жилийн баярын цэргийн ёслолын жагсаалд ОХУ-ын нийслэл Москва хотын Улаан талбайд 14 мянган цэргийн алба хаагч, 194 нэгж хугт техник, 150 онгоц, нисдэг тэрэг оролцуулан явуулахаар төлөвлөснөөс гадна тус улсын 26 хотод цэргийн жагсаалыг явуулахаар бэлтгэж  байгаа аж.

Энэхүү жагсаалд Монгол Улс, БНХАУ, Энэтхэг, Азербайджан, Армени, Беларусь, Тажикстан, Казахстан, Киргизстан, Серби гэх 10 улсын Зэвсэгт хүчнээс тус бүр 70 цэргийн албан хаагч бүхий нэг, нэг салбар оролцох юм байна.  

Монгол Улс, түүний Зэвсэгт хүчний уран чадвар, нүүр царайг Улаан талбайн жагсаалд төдийгүй, олон улсад харуулахаар Зэвсэгт хүчнээс 63, Хилийн цэргээс 12 алба хаагч байгаагийн 45 нь офицер, 25 ахлагч, 5 хугацаат цэргийн алба хаагч байна. Тэдний 41 нь энхийг сахиулах ажиллагаанд 1-3 удаа оролцож байсан туршлагатай. Нийт бие бүрэлдэхүүний 35 хувь нь Орос, Англи, Герман, Солонгос хэлийг зохих түвшинд эзэмшсэн шилдэг цэргийн алба хаагчид байгаа юм.

Ялалтын баярын парадад алхах монгол цэргүүд эх орныхоо дархан хил дээр үүрэг гүйцэтгэж байсан цэргийн  албан хаагч, Хүндэт харуулын 032 дугаар ангид хугацаат цэргийн албанд эх орны хөвгүүдээс бүрджээ.

Зэвсэгт хүчний 016 дугаар ангийн ахлах ахлагч Г.Батсайхан “Эх орны дайны ялалтын парадад монгол цэргүүдээ төлөөлөн алхах болсонд маш их бахархалтай байна. Бид зорьсон зорилгоо сайн биелүүлэх болно” гэсэн юм.

Харин Зэвсэгт хүчний Жанжин штабын дарга дэслэгч генерал Ц.Бямбажав “Монгол Улс, монгол цэргийг төлөөлөн явах гэж буй бие бүрэлдэхүүнд албан хүмүүс санаа тавьж, ямар байгаа нь үзэхээр ирж байна. Гэхдээ манай цэргүүд хэд хэдэн зүйлүүдэд онцгойлон анхаарах хэрэгтэй. Агуу ялалт бол цэрэг, иргэн нийт хүн төрөлхтний түүхэнд тохиосон томоохон үйл явдал. Энд цэрэг хүн парадаар алхана гэдэг бол насан туршийн бахархалт үйл явдал. Монгол хүн, монголын цэрэг гэж хэн бэ гэдэг дэлхий нийтийн хэмжээнд харагдана. Хувь хүний сахилга, зохион байгуулалт, биеэ авч явах байдал, хамгийн наад зах нь төрийн формыг зөв үзэмжтэй өмсөх нь чухал. Цэргүүдийнхээ гоо сайханд хүртэл анхаар гэдгийг захиж байгаа” хэмээн ярилаа.

Тэрбээр Сүхбаатарын талбайд ч бай, Улаан талбайд ч бай парадад алхана гэдэг бол ховорхон, бахархалт явдал. Парадад алхана гэдэг бол сойсон морь уралдаанд яаж явдаг яг тийм үйл ажиллагаа гэж онцолж байсан.

Улаан талбайд алхах монгол цэргүүд энэ сарын сүүлээр ОХУ-ыг зорино. Тэндээ бэлтгэлээ базааж байгаад ирэх тавдугаар сарын 9-ний өдөр Эх орны дайны ялалтын баярын парадад алхана.

Б.Хүлэг