АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаяр өнөөдөр мэдээлэл хийлээ. Тэрбээр мэдээлэлдээ "АН фракцгүй улс төрийн хүчин болж байгаагаа мэдэгдсэн. Намынхаа гишүүдийн захиалга, даалгавраар хийгдсэн энэ шийдвэрийг аймаг орон нутгийн намын байгууллагууд дэмжиж, фракцгүй АН-тай болохыг уриалсан уриалга ирүүлсээр байна. Өнөөдрийн байдлаар Архангай, Баянхонгор, Дундговь, Дархан-Уул, Өвөрхангай, Дорнод, Сүхбаатар, Увс, Ховд гэх мэт 12 аймгаас намын байгууллагууд фракцгүй АН-ыг дэмжиж уриалга ирүүллээ. Намын удирдлагуудын зүгээс фракцгүй, хүчтэй АН-ын төлөө явах чиг хандлагыг барьж ажиллах болно. Манай нам дөрөвдүгээр сарын 15-наас эхлэн аймгийн чуулган 2015 аяныг орон даяар зохион байгуулж байна. Энэ аяны зорилго нь орон нутгийн иргэдийн санаа бодлыг сонсох, анхан дунд шатны намын гишүүдэд сургалт зохион байгуулах, фракцгүй АН-ын хөгжлийн чиг хандлагаар гишүүдийн санаа бодлыг сонсож, нэгдмэл ойлголтод хүрэх зэрэг асуудлуудыг тогтоосон гэлээ.
“АН парламентад суудалтай намуудтай хамтран Засгийн газраа байгуусан. Энэ хугацаанд АН-аас албан ёсоор улс төрийн намуудын тухай байр сууриа илэрхийлээгүй өнөөдрийг хүрчээ. Засгийн газраа хамтран байгуулсан улс төрийн хүчнүүдээс МАН-д хандаж төрийн жинхэнэ албан хаагчдыг хомроглон халж байгаа хууль бус ажиллагаагаа таслан зогсоохыг АН-ын генсекийн үүрэг гүйцэтгэгч шаардлаа. “Хуулийн дагуу ажлаа хийж байгаа төрийн албан хаагчдыг 6 сарын тэтгэмж хүчээр өгч ажлаас нь халж, оронд нь өөр хүнд томилж, төсвийн хөрөнгийг үрэлгэн зарцуулж шалтгаангүйгээр төрийн албан хаагчдыг хомроглон халах асуудал Хөдөлмөрийн яам, БХБЯ, ЗТЯ, БОНХАЖЯ, МХЕГ, ОБЕГ-т хавтгайраад байна. МАН-аас томилогдсон Засгийн газрын гишүүд нийтдээ 500 гаруй төрийн албан хаагчийг хомроглон халаад байгаагаас БОНХАЖЯ өөрийн аппаратныхаа төрийн албан хаагчдын 50 гаруй хувийг, Хөдөлмөрийн яам удирдах бүрэлдэхүүнээ 100 хувь, мөн 21 аймаг, 9 дүүрэг, нийслэлийн хөдөлмөрийн хэлтсийн дарга нарыг бүгдийг нь халсан. МАН Засагт хамтарсан учраа эдийн засгийн хүндрэлээс хамтдаа гарья, хэмнэлтийн горимд шилжье гэж тайлбарлаж байснаа эргэн санаж эрх мэдэл, албан тушаал, ширээ сандлын хойноос яваагүй гэдгээ ард түмэндээ харуулах цаг боллоо. Засгийн газрын тэргүүн Ч.Сайханбилэгээс олон хүнийг хомроглон халсан Хөдөлмөрийн сайд С.Чинзоригийн тушаалуудыг хүчингүй болгож, халагдсан ажилтан албан хаагчдыг эргүүлэн томилуулсны дараа Төрийн албаны сонгон шалгаруулалтыг хийхийг шаардаж байна” хэмээн АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаяр мэдэгдэв. Тэрбээр мэдээлэл хийснийхээ дараа сэтгүүлчдийн сонирхсон асуултад хариулсан юм.
-Фракцгүй АН болох нь улс оронд ямар ашигтай вэ?
-Улс орны хэмжээнд фракцуудад албан тушаал хуваарилдаг байсан нь үнэн. Өмнөх Засгийн газрын нэг алдаа энэ байсан. Одоо бол бид АН-аас албан тушаалтныг томилохдоо хэн ямар фракцад байна гэдгээс хамаарахгүйгээр чадвар, мэдлэгтэй, төрийн албыг хашиж чадах хүн сонгодог тогтолцоо руу шилжинэ. Энэ манай намын мянган мянган гишүүдийн захиалга хүсэлт гэж ойлгож болно. Тиймээс фракц толгойлж байсан УИХ-ын гишүүд, намын удирдлагууд өөрсдөөсөө эхлэх ёстой гэж үзэж байгаа.
-Үндэслэлгүйгээр ажлаас халагдсан хүмүүсээс хэд нь АН-ын гишүүн бэ?
-Халагдсан төрийн албан хаагчдыг бид аль нам бэ гэдгээр хандахгүй байгаа. Төрийн албан хаагчийн тогтвор, суурьшилтай, нам солигдохоор хоморголон халдаг байдлыг таслан зогсоох ёстой. Цаашид бид төрийн албанд өгөө аваа шиг ханддаг байдлыг эцэслэх ёстой гэж үзэж байгаа.
-АН их хурлаа хэзээ товлон хуралдуулах бол?
-Улс төрийн намын тухай хууль батлагдсаны дараагаар их хурлаа товлоно.
-Я.Батсуурь намынхаа гишүүдэд хандсан байсан. Үүнд ямар байр суурьтай байна вэ?
-Түүний захидлыг хүлээж авсан. Гишүүдтэйгээ ярилцаж байгаа байр сууриа илэрхийлнэ.
Н.Энх