УИХ-ын чуулганы үдээс хойшхи нэгдсэн хуралдаан эхэллээ.  Үдээс өмнөх хуралдаанаар Хөдөлмөрийн аюулгүй байдал, эрүүл ахуйн тухай хуулийг хэлэлцсэн. Харин одоо байнгын хорооны саналаар хэлэлцэх нь зүйтэй гэсэн санал  хураалт явууллаа. Гишүүдийн олонхийн саналаар уг  хуулийн төслийг хэлэлцэхийг дэмжив.  Дараагаар нь  Гэр бүлийн хүчирхийлэлтэй тэмцэх тухай хуулийн төслийг хэлэлцэж эхэллээ.  Хуулийн төслийг Монгол Улсын Ерөнхийлөгчсанаачлан өргөн барьсан юм.

Уг  төсөлд хуулийн үйлчлэх хүрээг өргөтгөж гэрлэгчид, хамтран амьдарч, гэр  бүлийн гишүүн, асран хамгаалагч, хамгаалуулагч, харгалзан дэмжигч, дэмжүүлэгч, тодорхой нөхцөл шалтгааны улмаас тухайн гэр бүлд амьдарч байгаа хүн, тусдаа амьдарч байгаа төрүүлсэн болон үрчлэн авсан хүүхэд, төрсөн болон үрчлэн авсан эцэг, эх, ах, эгч, дүүгээс гадна эхнэр, нөхөр байсан, дундаасаа  хүүхэдтэй хүмүүсийг энэ хуулийн зохицуулалтад хамааруулсан. Энэ нь хохирогчдын дийлэнх хэсэг хуулийн хамгаалалтын гадна үлдэж байсныг  өөрчилж, хамгаалалтад хамрагдах  боломжтой болж байна.

Гэр бүлийн хүчирхийллийн дийлэнх тохиолдлыг зөвхөн зөрчлийн  хэмжээнд авч үзэж байсныг өөрчилж гэмт хэрэгт тооцон, ял ногдуулах зохицуулалтыг томъёолжээ. Гэр бүлийн хүчирхийллийг гэмт хэрэгт тооцсноор гэм буруутай этгээд хариуцлага гарцаагүй хүлээх нөхцөл бүрдэх аж.

Гэр бүлийн хүчирхийллийг эрт шатанд илрүүлэх суваг хязгаарлагдмал байдлаар хуульчлагдсан байсныг өөрчилжээ.  Мэдээлэх үүрэг бүхий  этгээдэд бүх шатны боловсролын байгууллагын багш, ажилтан,  эмч, эмнэлгийн мэргэжилтэн, нийгмийн ажилтан, баг, хороо, сум, дүүргийн холбогдох албан тушаалтан,  төрийн алба хаагч болон төрийн үйлчилгээг гэрээгээр гүйцэтгэж байгаа төрийн бус байгууллагын мэргэжилтэнг хамруулан өргөжүүлсэн байна.

Мөн мэдээлэгчийн талаарх нууцлалыг хадгалах, шаардлагатай тохиолдолд аюулгүй байдлыг хангах арга хэмжээ авах зохицуулалтыг тусгажээ.

Хохирогчид үзүүлэх үйлчилгээ цогц бус, төрөлжөөгүй, салангид  байдлаар хуульчлагдсан, үйлчилгээг хэн, ямар журмаарүзүүлэх талаарх зохицуулалт тодорхойгүй байсныг өөрчилсөн байна. Хохирогчид үзүүлэх үйлчилгээ  аюулгүй байдлын хамгаалалт,  эмнэлгийн тусламж,  сэтгэл зүйн,  нийгмийн халамжийн, хүүхэд хамгааллын, хууль зүйн туслалцаа үйлчилгээг үзүүлэх төрөлтэй байхаар томъёолжээ.    Мөн хүүхдийн  онцлог, хэрэгцээг  харгалзсан хамгаалалт, үзүүлэх үйлчилгээг нэгтгэх зорилгоор “Хүүхдийг гэр бүлийн хүчирхийллээс хамгаалах” гэсэн тусгай бүлгийн зохицуулалтыг нэмж томъёолсон байна.  

Ийнхүү  хэлэлцэж байгаа асуудалтай холбогдуулан гишүүдийн асуултад хариулж байна.

Н.Энх