Хятадын Нанжин хотын дарга асан Жи Жиан авлига авсан нь илэрсэн тул шүүхээс 15 жилийн хорих ял оноосон тухай “www.cp24.com” мэдээллээ. Шүүх Жи Жианийг хоёр сая юань буюу 323 ам.долларын авлига авсан хэмээн буруутгажээ. Хотын даргаас 120 мянган ам.долларын өртөг бүхий эд хөрөнгийг хураан авч, битүүмжилсэн байна.

Жи Жиан 2010 онд нь Нанжин хотын даргаар сонгогдохоосоо өмнө Куньшань болон Яньжоу хотыг удирдаж байжээ. Хотын дарга 2014 оны нэгдүгээр сард авлига авсан нь илэрч, коммунист намаас хөөгдсөн билээ.

Шүүх хурлын үеэр Жи хотын иргэдээсээ уучлалт гуйж, “Сайн удирдагч болохыг их хичээсэн юмсан. Харамсалтай нь бүтсэнгүй” гэж хэлжээ. БНХАУ-ын дарга Си Зиньпиний санаачилсан “Авлигаас салах” аяны хүрээнд 14 мянга гаруй өндөр албан тушаалтан ажлаасаа халагдаж, шүүхээс ял авчээ.

Б.Дэлгэрцэцэг