УИХ-ын чуулганы нэгдсэн хуралдаан үргэлжилж байна. Хуралдаанд Ерөнхий сайд татварын эрхзүйн орчин, цаашид хийх арга замын асуудлаар гишүүдийн асуултад хариулж байгаа юм.
УИХ-ын гишүүн Ц.Даваасүрэн:
-Гадагшаа чиглэсэн ажилд уургийн морь шиг зүтгэж, дотогшоо чиглэсэн ажилд хашин морь шиг зүтгэдгээ болимоор байна. Хөрөнгө оруулалтын мөнгийг нь өгсөн бол бизнесийн үйл ажиллагаа идэвхжүүлэх байсан. Хямралаас хумисанаар гарахгүй. Гадаадын татвар төлөгч нар мөнгөө Монголоор оруулдаг болох хэрэгтэй. Татвар нуун дарагдуулах нь гэмт хэрэг биш гэж хэлж болохгүй. Татвараа нуун дарагдуулсан асуудалд хууль хүчний байгууллагууд нугалаа хийж байгаа бол ил гаргах хэрэгтэй. Төр татвар төлөгчдөд хандсан хүмүүнлэгийн байгууллага биш. Татвараа төл, төсвөөс өгөх ёстой мөнгийг нь өг.
Сангийн сайд Ж.Эрдэнэбат:
-Төсөв хүнд байгаа. Жил бүрийн эхний улиралд энэ байдал үргэлжилдэг. Ямартай ч цалин, тэтгэврийг бүрэн хийж байна. Хөрөнгө оруулалтыг энэ сард эхнээс нь хийж эхэлнэ. Эхний ээлжинд зээлтэй байгаа аж ахуйн нэгжийг хүүгийн дарамтаас гаргана. Дотоодын бондоор их хэмжээний өр тавигдсан байсан. Тиймээс тодорхой хэмжээнд хүүгийн зардлыг өгч байгаа.
Ерөнхий сайд Ч.Сайханбилэг:
-Татвараас зайлсхийхэд л эрүүгийн хуулиар шоронд хоригддог байдлыг зогсооно. 38 сая төгрөгийн татвар дээр эрүүгийн асуудал үүсч байгаа. Энэ асуудлыг зохицуулах санааг хэлсэн. Тийм учраас мушгих асуудал байхгүй.
УИХ-ын гишүүн Д.Оюунбаатар:
-Татварын эрхзүйн асуудлаар бид хамгийн баялаг түүхтэй улс. Монгол татварын маш сайн хуультай байсан. Хамгийн хүнд НӨАТ аж ахуйн нэгж дээр тусч, хуурамч падан гарч байна. Энэ асуудлаар хуулийн төсөл өргөн барихаар дарагчих юм. Эдийн засгийн өршөөлийн хуулиа Эрүүгийн өршөөлтэй хамт оруулж ирэх хэрэгтэй. Яахаараа зээл авсан хүмүүст өршөөл байх ёстой юм.
УИХ-ын гишүүн Н.Номтойбаяр:
-Татвар төлөгчдийнхөө цар хүрээг тэлэх бодлого зайлшгүй шаардлагатай байна. Ажилгүйдлийг бууруулах арга замаа тодорхойлмоор байгаа юм. Татвар төлөгчдийн мөнгийг зөв зүйлд зарцуулах хэрэгтэй. Татвар төлөгчдийн мөнгийг боловсрол, эрүүл мэнд, дэд бүтэцэд зарцуулмаар байна. Татвар төлөгчдийн мөнгөөр зах барьдгаа болих хэрэгтэй.
Ерөнхий сайд Ч.Сайханбилэг:
-Цалингийн зардал 30 хувь байгаа нь үнэн. Төсвийн зардлын 60 хувь нь цалин, халамжийн чиглэлд гардаг. Хөрөнгө оруулалт 7 хувийг эзэлдэг. Тийм учраас нийгмийн даатгалын тогтолцоонд өөрчлөлт оруулах, сангийн зөв менежменттэй болох хэрэгтэй.
Ийнхүү Ерөнхий сайдын цаг өндөрлөлөө. Эдүгээ чуулганы хуралдаан хаалттай үргэлжилнэ. Хаалттай хуралдаанаар Цэргийн бодлогын асуудлыг хэлэлцэх юм.
Н.Энх
Уншиж байна |