Тавантолгойн хөрөнгө оруулагчидтай хэлэлцээр хийх Монголын багийн ахлагч, сайд М.Энхсайхан ихээхэн нервтэй байна.  Тэрбээр УИХ-ын даргын эрүүл ухаан хэзээ эргэж ирэхийг хүлээж буйгаа цахим хуудсандаа бичжээ.

Өчигдөр сайтуудаар УИХ-ын дарга З.Энхболдын “20 жилийн дараа авах 2500 төгрөг монголчуудад хэрэггүй” гэсэн видео бичлэг цацагдсан. УИХ-ын дарга Тавантолгойн 1072 хувьцааны талаар тоо бодож, тайлбарласан. Харин үүнд сайд М.Энхсайхан ийм тайлбар хийжээ.

М.Энхсайхан өөрийн цахим хуудсандаа “Ухаанд нь ухна ишиг үхэв" гэсэн гарчигтайгаар ийн бичжээ.

"Тавантолгойн төсөл 30 жилд сайндаа 900 сая тонн нүүрс олборлохоор байгаа. Дэд бүтэцгүй, төмөр замгүй, цахилгаангүй газарт эхний хөрөнгө оруулалт асар ихээр шаардаж буй тул төр,хувийн хэвшлийн түншлэл бас дээр нь гадаадын хөрөнгө оруулалт хэрэгтэй. Энэ дарганцар гэрээгээ уншаагүй байна доо.

Хөрөнгө оруулалтын өгөөжийг зөвхөн "татварын нүдээр" харж болохгүй шүү гэтэл сүүлдээ "үхмэл хувьцааны" нүдээр тайлбарлана гэх. Ардын маань үг л энэ үйлдэлд хариу болог. ТТ төсөл өрнөөс салах, ашиг, орлого авчирах, 500-600 дотоодын компанийг ажилтай байлгах, 10 000 хүнийг ажилтай, амьдралтай байлгах төсөл юмсан. Эрүүл ухаан хэзээ эргэж ирэхийг хүлээх л үлдлээ" гэжээ.