Азийн аварга шалгаруулах тэмцээнд оролцохоор Катарын Дохаг зорьсон ч виз зөрчилтэй гэж саатуулагдсан манай гурван тамирчин, нэг дасгалжуулагч өнөөдөр эх орондоо ирлээ. Шигшээ багийн дасгалжуулагч Б.Баяраа, 74 кг-ын тамирчин Д.Гомбодорж, 97 кг-ын тамирчин Д.Хүдэрбулга, 125 кг-ын тамирчин Н.Золбоо нар тавдугаар сарын 4-ний даваа гаригт Катарын виз зөрчилтэй гэж саатуулагдсан.
Тэд Дубайн онгоцны буудалд 36 цагийн турш саатуулагдаад, холбогдох журмын манай иргэдийг тээвэрлэсэн компаниар буцааж тээвэрлэх ёстой тул мягмар гаригийн шөнө Бээжин рүү буцаж, Бээжингийн онгоцны буудалд 5 цаг орчим саатуулагдаад тэндэх Элчин сайдын яаманд хандснаар нэг хоногийн дараа ийнхүү ирж байгаа аж.
Манай тамирчдыг хуурамч виз мэдүүлсэн гэж буруутган, хорьж цагдахад хүрчээ. Азийн аварга шалгаруулах тэмцээнд оролцохоор явсан тамирчдын визыг Монголын чөлөөт бөхийн холбоо хариуцан мэдүүлж, тамирчдыг нисэх өдөр буюу 5 дугаар сарын 3-ны өглөө электрон визийг хэвлэж өгсөн. Гэвч хил дээр тамирчдын визийг шалгахад өөр хүний нэр гарч ирсний улмаас саатуулагдахад хүрсэн гэж тамирчид ярьж байсан.
Тэднийг 36 цагийн турш Дубайн онгоцны буудлын хорих өрөөнд саатуулагдаж байхад Монголын чөлөөт бөхийн холбооноос анхаарал тавьж, ямар нэгэн тусламж үзүүлээгүй гэнэ.
Үндэсний шигшээ багийн дасгалжуулагч Б.Баяраа "Бид визний зөрчил ч бус хуурамч визний асуудалд орооцолдсон. Тиймээс биднийг Дубайд хорьж, цагдан, хатуу шалгаж, биднээс нарийн мэдээлэл шаардсан. Бид хэлэх ёстой зүйлсээ бүгдийг мэдүүлсэн. Би визний зөрчилгүй байсан. Намайг саатуулахдаа эхлээд хуучин паспорт шаардсан түүнийхээ хуулгыг авч явсан учир шалгаад хил нэвтрэхийг зөвшөөрсөн. Гэхдээ би гурван тамирчнаа хүний нутагт орхиод цааш явах боломж байгаагүй" гэж ярьсан.
Мөн тамирчид, дасгалжуулагч өөрсдөөс шалтгаалахгүй асуудалд орж, 36 цагийн турш хоригдож байхад чөлөөт бөхийн холбоог төлөөлж нэг хүн холбогдох арга хайгаагүйд гомдолтой байгаагаа илэрхийлж байсан. Түүнчлэн холбооны ерөнхийлөгч хил гарч чадаагүй тамирчдыг Бээжин рүү ниссэн гэсэн мэдээллийг олон нийтийн сүлжээнд тавьсан байсан ч тэр хугацаанд нь бид Дубайд хоригдож л байсан. Тэр үед манай холбооны удирдлагууд Дохад оччихсон байсан. Дубай, Доха хоёрын хооронд нэг цагийн л нислэгтэй. Гурван тамирчныхаа араас нэг цаг нисээд ирж болох л байсан. Гэхдээ хэн ч тэгээгүй. Олон нийтийн сүлжээнд бичсэн шиг Кувейтийн Элчин сайдын яамыг төлөөлж бидэнтэй хэн ч ирж уулзаагүй. Бээжинд мөн саатуулагдаж байгаад арай гэж Элчин сайдын яамны бараа харсан" гэж ярилаа.
Б.Бэхи
Уншиж байна |