УИХ-ын гишүүн О.Баасанхүү сэтгүүлчдэд мэдээлэл хийлээ. Өргөдлийн байнгын хороонд ирсэн өргөдөлтэй холбоотойгоор мэдээлэл хийсэн юм. Өргөдлийн байнгын хороонд Улаанбаатар хотод хандсан газар, сургууль, цэцэрлэгтэй холбоотой 1200 гаруй өргөдөл ирсэн байна. Тиймээс тус байнгын хорооны дарга О.Баасанхүү “Хотын дарга Э.Бат-Үүлийг нээлттэй хэлэлцүүлэгт дуудаж, өргөдлүүдийг танилцуулж, нэг бүрчлэн асуудлыг шийдвэрлэх үүрэг өгнө” гэв. “Уг нь иргэд хотоороо дмжуулж асуудлаа шидүүлэх ёстой байтал Өргөдлийн байнгын хороонд хандаад байна. Хот ажлаа хийхгүй байгаа нь эндээс харагдаж байна. Ялангуяа гэр хүссэн өргөдөл тасрахгүй байна. Ирэх долоо хоногоос хоттой холбоотой асуудлыг цэгцэлнэ” гэлээ.
Мөн өнөөдөр боловсролын хуультай холбоотой хэлэлцүүлэг хийх гэсэн боловч хойшлогдсон байна. Учир нь Боловсролын сайд, төрийн нарийн, дэд сайд нь хэлэлцүүлэгт ирээгүй аж. Дээрээс нь асуудал хариуцсан газрын дарга нар нь ирээгүй байна. “Шийдвэр гаргах түвшний хүмүүс нь ирээгүй байгаа учраас хэлэлцүүлгийг хойшлуулсан. Ерөнхий сайдад бичиг явуулсан. Энэ зардлыг буруутай хүмүүсээр төлүүлж УИХ-ыг хохиролгүй болго, хоёрт дараагийн хэлэлцүүлэг дээр дээрх албан тушаалтнуудыг заавал байлга. Хэрвээ төлүүлэхгүй бол тэр хүмүүсийг шүүхэд өгнө. Төрийн үйл ажиллагаанд хариуцлагагүй ханддаг энэ байдлыг зогсооно” гэв.
Өргөдлийн байнгын хороо “Петро чайна дачин” компани болон газрын тосны үйл ажиллагаа явуулдаг компаниудад АТГ болон бусад газруудтай хамтарсан шалгалт явуулахаар болжээ. “Яагаад гэвэл монгол хүний хийдэг ажлыг хийлгэхгүй байгаа. Усны машин, шороо зөөдөг машиныг монголчууд унаж чадна. Хог цэвэрлэдэг ажлаа л хийлгэдэг. Монгол хүмүүсийг ажлын байраар хангах ёстой гээд ажлын хэсэг гаргаад ажиллаж байна” гэв.
Мөн тэрбээр гишүүнийхээ хувиар Ерөнхий сайд Ч.Сайханбилэгийг огцруулах асуудлыг өргөн барихаар судалж байгаагаа мэдэгдэв. “Ерөнхий сайд Ч.Сайханбилэг Оюутолгой, Тавантолгойн төслийг хэрэгжүүлнэ. Эсвээс ОУВС-гийн хөтөлбөрийг хэрэгжүүлнэ. Дургүй хүнийг дарж байж сахил хүртээнэ гэж байна. Ерөнхий сайд хийж чадах олон хүн байгаа. Хоёр компаниас хамааралтайгаар эдийн засгийг сэргээнэ гэж байна. Засгийн газар хууль их зөрчиж байгаа. Өргөдлийн байнгын хороон дээр энэ талаар гомдол их ирдэг. Тендэрийг Засгийн газрын тогтоолоор компани зааж сонгож байна. Засгийн газрыг огцруулахаар хэд хэдэн гишүүн гарын үсэг зурахаа мэдэгдсэн” гэсэн юм. Тэрбээр мэдээлэл хийснийхээ дараа сэтгүүлчдийн сонирхсон асуултад хариулав.
-Засгийн газрын ямар тогтоол хууль зөрчсөн бэ?
-Засгийн газар байгуулагдсанаасаа хойш 200 гаруй тогтоол шийдвэр гаргасан байх. Засгийн газрын тогтоолоор шууд ажил гүйцэтгүүлэх нь хууль бус. Эдийн засгийг санаатайгаар унагааж байна. Тавантолгой төслийг авахаар л ажиллаж байна. Өөр зүйл хийхгүй байгаа.
Н.Энх