Украины Ерөнхийлөгч Петр Порошенкогийн Британийн “ВВС” агентлагт өгсөн ярицлагыг хүргэж байна.
-Украины зүүн хязгаарын нөхцөл байдлын тухай сонирхуулаач?
-“Нормандын дөрвөл”-ийн байгуулсан Минскийн гэрээний дагуу зүүн хязгаарт гал зогсоод нэлээдгүй хугацааг өнгөрүүллээ. Гэхдээ зөрчилтэй хэд хэдэн тохиолдол бүртгэгдсэн. Би энэ асуудалд голлох анхаарлаа хандуулж байгаа. Гэхдээ цагдаа, хүчнийхэн хэргийн газар очиход жинхэнэ хэрэгтэн сураггүй алга болсон байдаг. Энэ бүхэнд надад болон армийнханд ихээхэн дарамт учруулж, цаг хугацаа үрж байна.
-Өнөөдрийг хүртэл зүүн хязгаарт амьдарч буй иргэдийн амьдрал дордсоор байгаа. Цахилгаан, халуун ус тасраад 3-4 сар болж байна. Та итгэхгүй бол би зүүн хязгаарт ажиллаж буй сурвалжлах багийн явуулсан мэдээллийг үзүүлж болно?
-Би энэ талаар мэдэж байгаа. Хангалттай гэхэд болно. Олон сарын турш салан тусгаарлагчид болон армийнхны дунд өрнөсөн тулааны үеэр Донецк, Луганск мужид цахилгаан болон цэвэр ус тасарсан. Эрчим хүчний яам энэ асуудал дээр гол анхаарлаа хандуулна ажиллаж байгаа.
-Та энэ он гараад Донецк мужид гэнэтийн айлчлал хийсэн?
-Тиймээ. Салан тусгаарлагчид зорчигч тээврийн автобус руу пуужин харваж 19 хүний аминд хүрсэн. Би халдлагад өртсөн автобусны хэлтэрхийг Давос хотноо болсон эдийн засгийн форум уулзалтын үеэр олонд үзүүлж, зүүн хязгаарын жинхэнэ төрхийг олон улсад харуулах зорилготой байсан юм. Украины дайсан дэндүү хүчтэй. Эх орон, ард түмнээ хамгаалахын тулд надад олон улсаас тусламж хүсэхээс өөр арга байхгүй. Бодит байдал бол энэ.
-Та өрсөлдөгчөө хүчтэй гэлээ?
-Нэгэнт бүх зүйл тодорхой болсон. Зүүн хязгаарт хяналтаа тогтоохыг санаархаж буй салан тусгаарлагчид болон босогчдыг ОХУ-ын Ерөнхийлөгч В.Путин болон тус улсын Батлан хамгаалах яам санхүүжүүлж, зэвсгээр хангаж байгаа. Оросын олон хөлсний цэрэг Украинд салан тусгаарлагчдын талд байлдаж байна. Надад хангалттай, үнэн бодит мэдээлэл бий. Би энэ тухайгаа Путинд хүртэл мэдэгдсэн. Украин, Оросын дунд хэдийнэ дайн эхэлсэн. Хоёр улсын харилцаа дахин сэргэх боломжгүй болоод байна. Хамгийн гол нь бид хямралдаа Оросыг буруутай гэдгийг нотолж, нөхөн төлбөр авах зорилготой байгаа. Гэхдээ хугацаа их орох байх.
-Ерөнхийлөгч В.Путин Украины зүүн хязгаарт болж буй мөргөлдөөнтэй ямар ч хамааралгүй гэдгээ олон ч удаа уламжилсан. Тэрбээр “Украинд зөвхөн ахын ёсоор туслаж, хүмүүнлэгийн тусламжийг зүүн хязгаар руу илгээж байгаа” гэсэн?
-Хүн алсан хүн шийтгэл авахгүйн тулд хүн алаагүй гэж хэлдэг бас мэлздэг. Орос худлаа хэлж байна. Путиний худал үгэнд автах хэрэггүй. Украины жинхэнэ төрх, нөхцөл байдлын талаар зүүн хязгаарт амьдарч буй иргэд болон Украины Ерөнхийлөгчөөс өөр хэн сайн мэдэх билээ.
-Олон жилийн турш Украин-Орос найрсаг хөршүүд байлаа. Та Ерөнхийлөгчөөр сонгогдоод АНУ-д итгэл хүлээлгэж, хамтран ажиллах болсон. Мөн зүүн хязгаарын асуудлаас болж АНУ, Их Британи тэргүүтэй орнууд Москвагийн эсрэг эдийн засаг, аялал жуучлал, худалдааны салбарт хориг тавиад 1.5 жил болж байна?
-Дайн, зөрчил мөргөлдөөнийг санаатайгаар өдөөн турхирч, бий болгосон Орос зохих ёсныхоо хариуг авах ёстой. Миний бодлоор олон улсын зэрэглэлтэй бүх уралдаан, наадмыг Орос зохион байгуулах эрхгүй. Тиймээс 2018 онд Сочи хотноо зохион байгуулагдах хөлбөмбөгийн ДАШТ-д баг, тамирчнаа илгээхгүй байх хэрэгтэй. Нэг улсыг хүчгүй болгосон Оросууд баярлах учиргүй. Олон улс Оросыг бойкотлох учиртай.
-Украин хэзээ тайван болох бол. Таны ирээдүйн төлөвлөгөө?
-Энх тайван Украинд ус агаар шиг хэрэгтэй байна. Бид энх тайвныг тогтоохын тулд бүхий л бололцоогоо ашиглаж, шаардлагатай бүх улсаас тусламж хүсч явна. Украинчууд Путинээс айдаг. Путин, Порошенкогийн дайсан бус Украинчуудын гол дайсан.
Б.Дэлгэрцэцэг