Монголын хийрхэгчид эрх чөлөөгөө хэрхэн эдэлж буйгаа харуулсан нэгэн үйл явдал өнөөдөр болов. Хаанаас мөнгө үнэртэнэ тийшээ хошуурч, хэл амаа билүүдэж явдаг хэсэг нөхөд өнөөдөр  Ерөнхий сайд Ч.Сайханбилэгийн зургийг шатааж, “золигт гаргана”, “сор зална” хэмээн хийрхэв. Ч.Сайханбилэг Монгол оронд үлэмж их гай барцад авчирсан учраас түүнийг нь арилгах гэж зургийг нь шатааж буй гэнэ. Бас ийм Ерөнхий сайдыг хүсэхгүй байгаа учраас гэсгээн цээрлүүлнэ хэмээн ингэж өвчигнөв.

 Монгол эрх чөлөөтэй орон. Тиймдээ ч асуудал бүр рүү үсэрч, хэрүүлтэй хэвлэлийн бага хурал бүрт сууж, хэл амаа билүүдэж явдаг бууны ноход бий болсон. Тэдний үг хэлэх, үзэл бодлоо илэрхийлэх эрх чөлөөг хэн ч хязгаарладаггүй. Хэнээс мөнгө авсан тэр хүнийхээ төлөө дуугарах, хашгирах, архидан согтуурч агсамнах, өлсгөлөн зарлах, суулт хийх бүхий л эрх чөлөөг нь өнөөг хүртэл хэн ч хааж хязгаарлаагүй. Хадгаламж зээлийн хоршоодын хохирогчдын зовлонгоор хэсэг шоудсан тэд одоо уул усанд хайр зарлагчид болсон. Өглөөхөн Ноён уулыг дархан цаазат болго хэмээн Үндэсний мэдээллийн төвд “агсамнасаар” гарсан. Харин дараа нь ууланд очиж, Засгийн газрын тэргүүний зургийг шатааж, зүй бус авирлав. Тэдний үйлдлийг товчхоноор хүн гутаан доромжилсон гэмт хэрэг гэж болно.

Өнөөдрийн галзуурлыг зохион байгуулсан Гал үндэстэн холбооныхон өмнө нь Төрийн ордон руу буу шийдэмтэй дайрч, зарим нь өнөө ч шийтгэлээ эдэлж буй. Харин энэ шийтгэл тэдэнд сургамж болоогүй бололтой. Улам л даварч, хүний санаанд багтамгүй үйлдэл хийж буйгаас нь харвал тэдэнд чамгүй сайн даруулга хэрэгтэй бололтой.

Мэдээж ардчилсан улсад хүн бүхэн эрх чөлөөгөө эдэлж, үгээ хэлэх ёстой. Гэхдээ үйлдэлд хэмжээ хязгаар байх ёстой. Учир нь Монгол Улсад хууль үйлчилдэг. Ямар үйлдэл нь хууль бус, ямар нь зөвшөөрөгдсөн гэдгийг цагаан дээр хараар бичээд зааглаж ялгасан. Үүнийг мэдсээр байж мэдээгүй мэт авирлаж буй хүмүүст хууль байдгийг сануулах цаг болжээ. 

В.Хэрлэн