Иргэний харьяалал шилжилт хөдөлгөөний газрын дарга Д.Пүрэвдорж  нарт эрүүгийн хэрэг үүсгэн шалгаж эхэлсэн тухайгаа өчигдөр АТГ-аас албан ёсоор мэдэгдсэн.

Тэгвэл өнөөдөр ИХШХЕГ-ын дарга Д.Пүрэвдорж хэвлэлийнхэнд мэдээлэл хийлээ. Тэрбээр “Иргэн хүн хардах эрхтэй. Тэр хардсан зүйлээ гомдол болгон хуулийн байгууллагад өгдөг. Тэд үүнийг нь шалгах ёстой. Харин албан тушаалтнууд шалгуулах үүрэгтэй. Намайг АТГ-аас төсвийн мөнгө төгрөгтэй холбоотойгоор, албан тушаалаа урвуулан ашигласан гэдэг зүйл ангиар эрүүгийн хэрэг үүсгэсэн байгаа” гэж мэдээлэв.

Мөн “Эгэл ажилчдын хөлсөө урсган бүрдүүлж байгаа төсвийн мөнгөнөөс хумслах, сохор зоос ч ашиглах ёс суртахуун надад байхгүй. Би өөрийгөө буруугүй гэж үзэж байгаа. Албан тушаалтнууд өөртэй нь холбоотой хэрэг шалгах явцад хөндлөнгөөс нөлөөлөх явдал байдаг. Тийм учраас миний бие энэ хэргийн шалгалтын үйл явцтай холбоотойгоор, шалгалтыг хэвийн явуулах, хөндлөнгөөс нөлөөлөхгүйн үүднээс хэргийг шалгаж дуустал өөрийн хүсэлтээр ИХШХЕГ-ын даргын албан тушаалаас чөлөөлөгдөх өргөдлөө өнөөдөр өгч байна.

Ер нь ардчилсан орнуудад асуудалд холбогдсон албан тушаалтнууд асуудлаа шалгуулж, үнэн мөнийг тогтоолгоод, нэг төрөө сэргээлгэн,  буцаад ажилдаа ордог тохиолдол олон байдаг. Харин Монголд бол байхгүй. Тийм тохиолдол гарсныг би санахгүй байна. Би цаашид төрд зүтгэх хүнийхээ хувьд, улс төрийн ийм соёл, төрийн жишгийг монголд бии болгох гэсэн зорилготой байна. Шалгуулна. Үнэн мөн нь олдоно гэдэгт итгэлтэй байна” гэсэн юм.

Тэрбээр хэвлэлийн хуралд ирэхдээ ажлаас чөлөөлөгдөх өргөдлөө авчирсан байсан.

Авлигатай тэмцэх газраас Иргэний харьяалал, шилжилт хөдөлгөөний ерөнхий газрын удирдах болон гүйцэтгэх албан тушаалтнуудад холбогдуулан Эрүүгийн хуулийн 263 дугаар зүйлийн 263.2, 150 дугаар зүйлийн 150.3-д зааснаар эрүүгийн хэрэг үүсгэж, мөрдөн байцаалтын ажиллагаа явуулж байна. Мөрдөн байцаалтын ажиллагаа энэ сарын 6-ний өдөр эхэлжээ.

Б.Хүлэг