Монгол Улсын Ерөнхийлөгч, Зэвсэгт хүчний ерөнхий командлагч Ц.Элбэгдорж дөнгөж сая зарлиг гаргаж, бригадын генерал Дуламсүрэнгийн Давааг Зэвсэгт хүчний Жанжин штабын даргаар томиллоо. Мөн түүнд хошууч генерал цол олгов.

Тэрбээр "Надад маш өндөр хариуцлага ногдож байгааг гүнээ ухамсарлаж байна. Хүлээж авсан энэ албандаа бүх бололцоогоо дайчлан ажиллаж, цэрэг олон түмнийхээ сайн сайхан, зэвсэгт хүчний хөгжлийн төлөө хичээж ажиллах болно" гэв.

ЗХЖШ-ын дарга, хошууч генерал Д.Даваа нь 1963 онд төрсөн. 1994 онд ЗХУ-ын Вольск хотын Цэргийн ар талын дээд сургууль, Санкт-Петербург хотын Цэргийн ар тал, тээврийн академийг Цэргийн ар талын команд штаб, оператив тактикийн мэргэжлээр төгсчээ. Тэрбээр Монголын ардын армийн 162 дугаар ангид хүнс, хувцасны албаны даргаар ажлын гараагаа эхэлж ангийн хүнсний хангалтын тасгийн дарга, захирагчийн орлогч, ар талын дарга, Батлан хамгаалахын их сургуулийн Цэргийн дээд сургуулийн тэнхмийн эрхлэгч, ар тал эрхэлсэн дэд захирал, Батлан хамгаалах яамны Санхүү, хөрөнгө оруулалтын хэлтсийн дарга, Зэвсэгт хүчний Жанжин штабын Цэргийн хангалт, үйлчилгээний газрын даргаар ажиллаж ирсэн байна.