МУГЖ С.Жавхлан Үндэсний мэдээллийн төвд хэвлэлийн бага хурал хийж, төрийн эсрэг үсээ хусуулах гэж буйгаа мэдэгдэв. Тэрбээр ирэх сарын нэгэн буюу лхагва гаригт Чингисийн талбайд үсээ хусуулах аж. Ингэхдээ олон нийтийг ч тухайн өдрийн 11:00-12:00 цагийн хооронд хооронд төв талбайд ирж, үсээ хусуулан эсэргүүцлээ илэрхийлэхийг уриалав.
С.Жавхлан “Үсээ авах нь эсэргүүцлийн дээд хэлбэр юм. Тамгагүй төр буюу цахим ертөнцөд итгэл сэтгэлээрээ нэгдээд үйл ажиллагаа явуулж байгаа залуучууд бол өнөөдөр тамгаа авах цаг нь ирчихжээ. Олуулаа больё гэсэн хэрнээ яагаад эх орноо гэсэн сэтгэлтэй хүмүүсийг барьж хориод, хөөж явуулаад байгаа юм бэ. Ингээд нэгнийгээ хөөгөөд байвал хүмүүс малаасаа хурдан алга болно шүү дээ. Харьд байгаа эрдэм мэдлэгтэй хүмүүсээ дуудмаар байгаа юм. Хүний эрх айхтар муухай зөрчигдөж байна. Монголчууд буруу зүйл хийсэн нэгнээ уучлах хэрэгтэй. Хүнлэг энэрэнгүй ардчилсан нийгэм биш дарангуйллын нийгэм тогтчихоод байна. Өөрсдийн толгойг ухахгүй өвөг дээдсийнхээ үлдээсэн толгойг ухах гэж дайрахаа болиочээ. Нэгдүгээрт, газар шороогоо зарж монгол түмнийг гомдоогоод байгаа энэ хүмүүсийг тараач гэж шаардаж байна. Хоёрдугаарт, эрх нь зөрчигдөж байгаа хүмүүсийг өмөөрч, суллаж, уучлал гуйх хэрэгтэй. Гуравдугаарт, монголчууд бүгд татварын өрөнд орчихсон хэцүү байгаа. Бүгдээрээ энэ хүмүүсийг гарч иртэл нь шаардаж асууя” гэв.
С.Жавхлантай Гавьяат тамирчин Ц. Шаравжамц нэгдэж, үсээ хусуулна гэдгээ энэ үеэр хэлэв. Тэрбээр сэрцүүцэхийн тулд үсээ хусуулах гэж байгаа юм биш. Харин сэхээрч, сэрэхгүй байгаа эрх мэдэлтнүүдэд эсэргүүцлээ илэрхийлэхийн тулд энэ үйлдлийг хийж буйгаа тайлбарлав.