Гацууртын ордыг ашиглах төсөл УИХ-ын босгонд хоёронтоо тээглэж, Засгийн газарт буцсанаас хойш сураггүй байна. Дахин өргөн баригдах нь ч тодорхойгүй. Төрийн ажил ийн нам жим байх хооронд Ноён уулын орчимд нинжа нар түжигнэж байна.
Өнгөрсөн сарын 16-нд Ноён уулын Нарстайн аманд гар аргаар алт олборлогчид цуглаж, уулыг ухаж байсныг орон нутгийн цагдаа нар тараасан тухай бид мэдээлж байсан. Үүний дараа мөн л өнгөрсөн сарын 20-нд Ноён ууланд нинжа нар дахин халдсан. Нийт 12 машин, 3 мотоцикльтай нийт 80 хүн Ноён уулын Билүүтийн аманд малтлага хийж байсныг Сэлэнгэ аймгийн Мандал сумын цагдаа нар ирж, тараасан байдаг.
Тэгвэл өнгөрсөн сарын 27-нд нинжа нар Ноён ууланд дахин малтлага хийж, тараахаар очсон хамгаалалтын алба болон цагдаа нарт эсэргүүцэл үзүүлжээ. Тэд долоодугаар сарын нэгэн хүртэл малтлага хийхээр Засаг даргатай тохиролцсон хэмээн гүрийж, цагдаагийн шаардлагыг биелүүлэхээс татгалзсан бичлэг интернетэд тавигджээ. Бүр зохион байгуулалтад орж, “Түнхэлийн баатар вангийн хишиг” нэртэй ТББ байгуулан, хууль ёсны дагуу үйл ажиллагаа явуулж байна хэмээн цагдаа нарт “томорсон” байна.
Ийн нинжа нар Ноён ууланд удаа дараа халдаж, Сентерра Гоулд Монголия ХХК-ийн Хамгаалалтын албаны ажилтнууд болон орон нутгийн цагдаа нарт дийлдэхээ больжээ. Албан бус мэдээгээр 1000 орчим нинжа нар Ноён уулын бүсэд орж гарч, малтлага хийж буй аж.
Хууль ёсны үйл ажиллагааг гацаанд оруулж байх хооронд нинжа нар Ноён ууланд эзэн сууж, ухаж малтах ёстой хэмээн дураар аашилж байна. Нинжа нарын хэлдгээр адилхан монгол хүмүүс гээд тэднийг оруулж болно. Гэвч нинжа нарын ул мөр болон үлдэх ухсан нүх, овоолсон шороог яах вэ? Хэн нөхөн сэргээлт хийж, Ноён уулыг аврах вэ?!
В.Хэрлэн