Улаанбаатар
Ослын буруутанг тогтоохоор шүүхэд хандав
2015-7-10

Малайзын “МН17” онгоц өнгөрсөн оны долоодугаар сард Украины зүүн хязгаарт осолдож, 295 хүн амиа алдсан билээ. Ослын буруутан өнөөдрийг хүртэл олдоогүй байгаа юм. Малайзын Засгийн газар “МН17”-ийн ослын жинхэнэ буруутанг тодруулахын тулд олон улсын шүүхэд хандахаар болжээ. Малайз улс НҮБ-ын Аюулгүйн зөвлөлийн гишүүн учир “МН17”-ийн хэргийг шийдвэрлүүлэх тогтоолын төслийг өргөн барьсан тухай “AFP” агентлаг мэдээллээ. Малайзын өргөн барьсан тогтоолын төсөлд Австрали, Голланд, Бельги болон Украин улс хамтарсан гэнэ.

 

“МН17”-ийн ослын ард ОХУ-ын Засгийн газар байгаа хэмээн олон улс харддаг билээ. Тиймээс Аюулгүйн зөвлөлийн гишүүн орнууд Орост шинэ хориг тавихаар зэхэж байгаа гэнэ. Гэхдээ “МН17”-ийн осолтой Орос ямар ч хамааралгүй хэмээн мэдэгдсан билээ.

 

Зүүн хязгаарт хяналтаа тогтоогоод буй салан тусгаарлагчид ослын буруутанг Украины Засгийн газар гэж мэдэгдсэн удаатай. Харин Украины Засгийн газар “МН17”-ийн сүйрлийг Оросын захиалгаар салан тусгаарлагчид үйлдсэн гэдэг юм.

 

Б.Дэлгэрцэцэг

Shuud.mn
Сонин хачин