Баян-Өлгий аймгийн нутаг, Алтай Таван Богд ууланд авирч байсан таван хүн сураггүй алга болж, харамсалтайгаар эндсэн, талийгаачдын цогцсыг онгоцоор тээвэрлэн Улаанбаатар хотод авчирсан талаар бид өмнө нь мэдээлж байсан. Тэгвэл цогцсыг олох ажиллагаа хэрхэн явагдсан талаар Баян-Өлгий аймгийн Онцгой байдлын газрын орлогч дарга, Онцгой байдлын дэслэгч Б.Амандыхаас тодрууллаа.
-Сайн байна уу. Өнгөрөгч баяр наадмын өдрүүдэд танай аймгийн нутаг, “Алтай-Таван Богд” ууланд авиралт хийж байсан уулчид амиа алдсан. Тэднийг эрэн хайх ажил хэр удаан үргэлжилсэн бэ. Хэдэн албан хаагч уг ажиллагаанд оролцсон бэ?
-Аймгийн Онцгой байдлын газарт энэ сарын 13-нд Монгол экспедишн ХХК-ийн менежер Н.Мөнгөншагайгаас “Баян-Өлгий аймгийн Цэнгэл сумын нутаг, “Алтай-Таван Богд” ууланд авиралт хийж явсан 5 иргэн сураггүй алга болсон байна” гэсэн мэдээлэл ирсэн. Үүний дагуу Онцгой байдлын ерөнхий газрын даргын тушаалаар 2015 оны 7 дугаар сарын 13-ны өдөр 12 цаг 30 минутанд аймгийн Онцгой байдлын газрын дарга, онцгой байдлын хурандаа Ц.Баттулгаар ахлуулсан 7 хүний бүрэлдэхүүнтэй эрлийн шуурхай бүлэг ажиллалаа. Шуурхай эрлийн бүлэгт Хилийн 0165 дугаар ангийн нэг, 0285 дугаар ангийн хоёр албан хаагч багтаж явсан гэдгийг онцолмоор байна.
Шуурхай бүлэг 19-18 БӨТ улсын дугаартай Фургон автомашинаар Баян-Өлгий аймгийн төвөөс “Алтай-Таван Богд” уул руу хөдөлж, оройн 21 цаг 50 минутад төрийн тахилгат овоонд очсон. Овооноос жуулчид байрлаж буй газар хүртэл шавар намагтай, машин очиход хүндрэлтэй байсан учраас 3 цаг явж, 01 цаг 10 минутын үед төв бааз дээр очсон. Ингээд маргааш нь буюу энэ сарын 14-ний өглөө найман цагт эрлийн ажлаа эхлүүлсэн.
-Уулчдын цогцсыг хэдэн удаа авиралт хийж байж олсон бэ. “Алтай-Таван Богд” уулын аль хэсгээс олсон бэ?
-Нэг удаагийн явалтаар гурван удаа авиралт хийж байж тэднийг “Алтай-Таван Богд” уулын “Хүйтний оргил”-оос олсон. Эрлийн баг тэднийг олоод, нисдэг тэрэг буух боломжтой далайн түвшингээс дээш 3640 м өндөрт, уртрагийн 49009’19’’, өргөргийн 87050’43’’-ын байршилд хүргэж, нисдэг тэрэгт шилжүүлэн ачсан.
-Эрлийн үеэр хүмүүсийн очиж байгаагүй газраар аюул сөрөн явсан гэж үнэн үү?
-Үнэн. Эрлийн шуурхай бүлэг эрэн хайх ажиллагааг гүйцэтгэх явцад гурван удаа ангал руу чиглүүлэгч унасан. Мөн албан хаагчдын маань өвдгөөр татсан, зарим газраар бүсэлхийгээр татсан цасан хунгар дундуур явж, хүмүүсийн хөл тавьж байгаагүй газраар аюул сөрөн явж албан үүргээ амжилттай гүйцэтгэлээ.
-Эрлийн ажилд танай албан хаагчдаас гадна гавьяат тамирчин Г.Өсөхбаяр тэргүүтэй “Монголиа экспедишн” компанийн уулчид оролцсон гэх мэдээлэл тараад байгаа.
-Харамсалтай нь тухайн эрлийн ажлыг гүйцэтгэх явцад “Алтай-Таван Богд” ууланд авиралт хийж явсан “Уулчид” дэмжлэг туслалцаа үзүүлж эрлийн ажилд оролцсонгүй. Гавьяат тамирчин Г.Өсөхбаяр нар биднийг эрэл хийж байх үед аль хэдийнэ Баян-Өлгий аймаг руу явж байсан. Яагаад ийм ташаа мэдээлэл тархаж байгаад гайхаж байна. Онцгой байдлын аврагчид маань мэргэжлийн хүмүүс. Тийм учраас юу боллоо гэж гавьяат тамирчнаар багаа ахлуулах билээ.
Б.Дэжид