Тэрбумтан Дональд Трамп өнгөрсөн тавдугаар сард 2016 оны АНУ-ын Ерөнхийлөгчийн сонгуульд сөрөг хүчин Бүгд найрамдах намаас нэр дэвшиж буйгаа мэдэгдсэн юм. Трампийн “www.businessinsider.com” сайтад өгсөн ярилцлагыг хүргэж байна.

-Та 2012 онд АНУ-ын Ерөнхийлөгчийн сонгуульд нэр дэвшихээ мэдэгдэж байсан ч хэсэг хугацааны дараа нэрээ татсан. Харин ганцхан сарын өмнө 2016 оны Ерөнхийлөгчийн сонгуульд нэр дэвшихээ мэдэгдэж, албан ёсоор кампанит ажлаа эхлүүлээд байгаа. Танд Ерөнхийлөгч болох боломж байгаа болов уу?

-Мэдээж хэрэг улс төрийн амьдрал гадаад ертөнцөөс өөр. Би бол азтай нэгэн. Учир нь би улс төр, бодит амьдрал, хийсвэр амьдралд дасан зохицох чадвартай. Сонгуульд ялалт байгуулах итгэлтэй учир нэрээ дэвшүүлсэн. Би ялагдах дургүй. Энэ сонгуульд ч гэсэн ялагдахыг хүсэхгүй байна. Би өнөөдрийн өндөрлөгт хүрэхийн тулд их зүйлийг золиослосон. Амаргүй давааг туулсан. Америкийн эдийн засагт ихээхэн туслалцаа үзүүлсэн. Олон ч бизнесмэнийг мөнгөтэй, итгэлтэй болгоход тусласан. Би харагдахуйц, атгах боломжтой зүйлсийг Америкт хийж бүтээсэн. Би амласнаа биелүүлдэг цөөхөн хүний нэг. Учир нь надад эрх мэдэл байна. Харин энэ эрх мэдлээ илүү баталгаатай, нэг бүлэг хүмүүст бус бүх америкчуудад хүргэхийн тулд надад илүү эрх мэдэл хэрэгтэй байна. Тиймээс би Ерөнхийлөгч болохыг хүссэн. Би эрх мэдэлд дуртай. Эрх мэдэл бүгдийг ялдаг. Сүүлийн жилүүдэд Америкийн нэр хүнд олон улсад унаж байна. Ар араасаа халдлага гарч, олон хүн хохирогч болж үлдлээ. Өнөөгийн удирдлагуудад энэ бүхнийг цэгцлэх, цэглэх боломж хангалттай байгаа ч юу ч хийхгүй байна. Энэ бүхэн миний дургүйцлийг хүргэж байна. Америкт шинэ, шударга удирдагч хэрэгтэй. Хэрвээ би Ерөнхийлөгч болбол энэ бүхнийг цэглэж, амар амгалан илүү хяналттай, илүү итгэлтэй, илүү хөгжилтэй Америкийг бий болгох болно. Миний бий болгосон эзэнт гүрэнг хэн ч муулж, халдаж чадахгүй. Би Америкийг өөрийн боловсруулсан төлөвлөгөөгөөр удирдах болно.

-Та Бүгд найрамдах намаас Ерөнхийлөгчийн сонгуульд нэр дэвших сонирхолтой байгаа. Гэтэл энэ намаас 16 хүн нэр дэвших хүсэлтээ гаргасан. Сонгуульд өрсөлдөхийн тулд намын нөхдөө ялах шаардлагатай?

-Бүгд найрамдахчууд сонгуульд ялалт байгуулахын тулд бүх хүч чадлаа нэг хүнд төвлөрүүлэх хэрэгтэй. Олон хүн сонгуулийн төлөө өрсөлдөх нь буруу. Тиймээс намын удирдлагууд нэр дэвшигч бүрийг бүртгэж авахгүйгээр надад итгэл хүлээлгэж, миний саналыг хүлээн авч, албан ёсны кампанит ажлыг минь эхлүүлэх хэрэгтэй. Цаг алдах хэрэггүй. Бидний гол зорилго ялалт байгуулах. Тиймээс ялалт байгуулах боломжтой, Ерөнхийлөгч болох боломжтой Трампийг дэмжих хэрэгтэй.

-Нам доторх хүчтэй өрсөлдөгч бол Ерөнхийлөгч аав, ахтай Жеб Буш. Түүнд улс төрийн арвин мэдлэг байгаа. Намын удирдлагууд хүртэл бага Бушийг дэмжиж байгаа?

-Би энэ эрхмийн мэдлэг чадварыг үгүйсгэхгүй. Гэхдээ Бушийн гэр бүл АНУ-д дайсан л нэмсэн. Энэ бүхнийг сонгогчид мартах учиргүй. Би үнэн зүйл ярьж байна.

-Нууц санал хураалт тун удахгүй болж Бүгд найрамдахчууд нэр дэвшигчээ тодруулж, албан ёсоор зарлах болно. Бүх зүйл тайлагдашгүй. Хэрвээ энэ удаад намаасаа гарч ирэхгүй бол?

-Уурлах болно. Учир нь Бүгд найрамдахчуудыг ялалтад хүргэж чадах ганц хүн бол би. Надад дэмжигчид байна. Надад бүх зүйл байна. Тиймээс алдаа гаргахгүй байх ёстой. Бид ялалт байгуулахыг хүсч л байгаа бол алдаа гаргах ёсгүй.

-Үнэхээр ялалт байгуулахдаа тийм итгэлтэй байна гэж үү. Энэ их итгэл хаанаас ундраад байна вэ?

-Би бол Трамп. Дональд Трамп.

-Америкчуудын дунд явуулсан дараагийн ерөнхийлөгчийн талаарх интернэт санал асуулгаар Төрийн нарийн бичгийн дарга асан, Тэргүүн хатагтай асан Хилари Клинтон тэргүүлсэн бол удаах байранд Жеб Буш багтсан. Америкт үнэхээр эмэгтэй төрийн тэргүүн хэрэгтэй юу. Зүгээр сонгогчийн хувиар энэхүү асуултад хариулна уу?

-Ерөнхийлөгч Барак Обамагийн бие хамгаалагч. Хилариг олон жилийн өмнөөс сайтар бэлтгэсэн. Тиймээ энэ эмэгтэй миний хүчтэй өрсөлдөгчийн нэг. Гэхдээ Америк сүүлийн 30 жил эмэгтэй Ерөнхийлөгчтэй болох шаардлагагүй. Илүү тайван цаг ирэхээр эмэгтэй хүн төрийн эрхийг авч болно. Одоо биш. Америк хэтэрхий аюултай нөхцөлд байна. Хэт даврагчид эрх мэдлээ бататгах зорилготой байна. Олон гүрэн цөмийн зэвсэгтэй болохыг хүсч нууц хэлэлцээр хийж байна. Аюул хаалганы ард байна. Хаалга онгойлгоход л юу болох хэдэн хүн амиа алдахыг хэн ч тааварлашгүй. Хэрвээ энэ цаг үед эмэгтэй хүн төрийн эрхийг авбал харуусал, гашуудал, айдсын салхи Америкийг чиглэх эрсдэлтэй. Би Хиларигийн эрдэм мэдлэг зарим зүйлийг үгүйсгээгүй. Зүгээр л эмэгтэй хүн төр барих цаг нь болоогүй. Өнөөдөр Америк хүчтэй байгаа нь шилдэг удирдагчидтай шууд холбоотой. Эмэгтэй хүн төрд байх ёсгүй гэж хэлээгүй. Хүчирхэг байдлаа хадгалан үлдэхийг хүсч байгаа бол эмэгтэй хүнийг сонгох шаардлагагүй. Энэ хариултад сонгогчийн хувиар хариуллаа.

-Та Ерөнхийлөгч болбол цагаачлалын хуулинд өөрчлөлт хийх болно гэсэн?

-Обама өнгөрсөн саруудад дур зоргоороо аашилсан. Тэрбээр таван сая цагаачийг эх оронд минь үлдэхийг зөвшөөрсөн. Америк нэгдсэн улс гэх шалтгаанаар бүх хүнд орогнол олгох ёсгүй. Хэр хэмжээ, хяналт байх ёстой. Би Ерөнхийлөгч болбол хууль зөрчсөн бүх цагаачийг гаргах болно. Хүн бүр хуулийг хүндлэх ёстой. Хэн ч хуулиас гадуур амьдрах учиргүй.

-Та саяхан Мексикээс ирсэн цагаач ажилтнаа халж, шуугиан тарьсан. Мөн энэ амьдралдаа Мексикт очихгүй, мөн цагаачдыг үзэн яддаг гэсэн. Америкчууд цагаачтай гэрлэсэн тохиодол их. Та сонгогчдын саналыг авах чухал үед яагаад ийм мэдэгдэл хийсэн юм бэ?

-Ажилтнаа халсан нь ажлын хариуцлагатай шууд холбоотой. Харин цагаачдын асуудал дээр хяналт тавих хэрэгтэй. Сүүлийн үед гарч буй гэмт хэргүүдийн ихэнхийг цагаачид үйлдсэн. Америкчууд эх орондоо байгаа мөртлөө цагаачдаас айх ёстой гэж үү. Мексикт очих эсэх нь хувь хүний асуудалтай холбоотой. Энэ бүхэнд тайлбар хийх нь илүүц биз. Хэрвээ жинхэнэ Америкт амьдрахыг хүссэн нэгэн надад сонголтоо өгөх болно. Би хэнийг ч албадахгүй. Шударгаар өрсөлдөх болно.

-Ойрхи Дорнодын асуудалд хэрхэн анхаарлаа хандуулах вэ?

-Америк хүчтэй. Тиймээс хүч чадал юу болохыг мэдрүүлэх болно. Тохиролцоо гэж үгүй, шууд дайрах хэрэгтэй. Тэднийг ялах бол цаг хугацааны асуудал.

Б.Дэлгэрцэцэг