Монгол Улсын Их Хурлын дарга З.Энхболд 2015 оны долоодугаар сарын 28-ны өдөр буюу өнөөдөр УИХ-ын ээлжит бус чуулган товлон зарлах тухай 156 тоот захирамж гаргалаа.

Монгол Улсын Үндсэн хуулийн 27 зүйлийн 3 дахь хэсэг, Монгол Улсын Их Хурлын тухай хуулийн 16 дугаар зүйлийн 16.2, 16.4 дэх хэсгийг үндэслэн гаргасан тус захирамжид Улсын Их Хурлын ээлжит бус чуулганыг 2015 оны 08 дугаар 03-ны өдрөөс 08 дугаар сарын 14-ний өдрүүдэд зарлан хуралдуулж, дараах асуудлыг хэлэлцэхээр заажээ. Үүнд:

1/ Монгол Улсын Засгийн газрын зарим гишүүнийг огцруулах /чөлөөлөх/, томилох тухай асуудал;

2/ Эрүүгийн хууль /шинэчилсэн найруулга/-ийн болон холбогдох бусад хуульд нэмэлт, өөрчлөлт оруулах тухай хуулийн төслүүд;

3/ Зөрчлийн тухай болон холбогдох бусад хууль нэмэлт, өөрчлөлт оруулах тухай хуулийн төслүүд;

4/ Галт зэвсгийн тухай хууль /шинэчилсэн найруулга/-ийн болон холбогдох бусад хууль нэмэлт, өөрчлөлт оруулах тухай хуулийн төслүүд;

5/ Эдийн засгийн ил тод байдлын тухай хуулийн төсөл;

6/ Өршөөл үзүүлэх тухай хуулийн төслүүдийг хэлэлцэхээр заажээ.

Мөн УИХ-ын ээлжит бус чуулганыг 2015 оны 08 дугаар сарын 03-ны өдрийн Даваа гарагийн 09.30 цагт эхлэхээр товлосон байна. Ээлжит бус чуулганы хуралдааныг өглөө 09.30 цагаас эхэлж үдээс хойш 14.00 цагаас үргэлжлүүлэхээр захирамжилжээ.

П.Наран