УИХ-ын чуулганы нэгдсэн хуралдаанаар Эдийн засгийн ил тод байдлыг дэмжих хуулийн төслийг хэлэлцэх эсэхийг шийдлээ. Гишүүд энэ хуулийн төсөлд саналаа хэлсэн юм.
УИХ-ын гишүүн Р.Гончигдорж:
-Эрүүл бизнесийн орчинд амьдрах нь зөв. Далд эдийн засаг бол шударга эдийн засгийн хамгийн хар тал. Шударгаар бизнес эрхэлж байгаа хүнд бусад нь шударгаар ороод ирэх шиг сайхан зүйл байхгүй. Нөгөө талаас тэд төр өршөөл гуйж байгаа хэлбэр.
УИХ-ын гишүүн Д.Оюунбаатар:
-Нийгмийн дотор маргаан дэгдээсэн, хүлээлт үүсгэсэн хууль. Нөхцөл байдлаас харахад хуулийг гаргах шаардлага байгаа. Гэхдээ хуулийн төслийн боловсруулалтын ажиллагаанд дутагдал байна. Шударгаар татвараа төлж ирсэн хүмүүстээ бага ч гэсэн урам өгөх хэрэгтэй. 2015 оны жилийн эцсийн татварыг тооцохдоо 5 хувийн хөнгөлөлт үзүүлчих хэрэгтэй. Нөгөөтэйгүүр гадаадад, офшор бүст байгаа мөнгийг нь ил тод болгох асуудлыг шийдэх нь зөв.
УИХ-ын гишүүн З.Баянсэлэнгэ:
-Энэ асуудал явах ёстой. Хүмүүсийн хүсэн хүлээж байгаа хууль. Гагцхүү далд эдийн засгийг ил болгох заалтыг илүү түлхүү оруулж ирсэн учир маргаан дагуулаад байгаа юм болов уу гэж харж байна.
УИХ-ын гишүүн Х.Тэмүүжин:
-Өрөөлд Өршөөлийн юм уу, ил тод байдлын хуулиар дэмжлэг үзүүлэх гэхээр эсэргүүцээд байх юм. Эдийн засгийн хямралын энэ үед айлуудыг талхтай нь байлгаж байгаа баялаг бүтээгчдээ дэмжих хэрэгтэй. Хоёр үзүүртэй зүү шиг бусдыг хорлодог хүмүүс л улс орныг хохироож байна.
УИХ-ын гишүүн Д.Ганхуяг:
-Эдийн засаг саарсан. Далд эдийн засаг 40 хувьтай байна гэсэн. Манай хувийн хэвшлийнхэн бусад орноос ялгаатай нь зээлийн орчинд үйл ажиллагаагаа явуулдаг. Хуулийг хэлэлцэж батлах гэж байна гээд жил гаруй боллоо. Энэ нь эргээд төсвийн орлогын бүрдэлтэд сөрөг нөлөө үзүүлсэн. Монголчуудын хөрөнгө ил болоод эдийн засгийн эргэлтэд орох нь зүйтэй. Хугацаа алдаж болохгүй. Албан тушаалтантай холбоотой асуудлыг өршөөлд хамруулахгүй гээд заасан байгаа. Энэ хууль баялаг бүтээгчдээ л дэмжиж байгаа хууль. Чингис бондын санхүүжилтээр бүтээн байгуулалт хийсэн. Үүнд хөнгөлөлтэй зээл олгоход яагаад болохгүй вэ. Энэ хуулийг улстөржүүлмээргүй байна.
Ийнхүү гишүүд үг хэлсний дараагаар санал хураалт явуулсан юм. Гишүүдийн 58 хувийн саналаар хэлэлцэхийг дэмжив.
Н.Энх