“Өсвөрийн шатарчдын дэлхийн олимпиад-2015” Монгол улсад энэ сарын 19-29-ний хооронд зохион байгуулагдана. Дэлхийд чансаа өндөртэйд тооцогдох тус тэмцээний бэлтгэл нэгэнт хангагдаж, тамирчидаа хүлээж авахад бэлэн болжээ.

Өсвөрийн шатарчдын дэлхийн олимпиадад 26 орны 200 гаруй тамирчин өрсөлдөхөөр бүртгүүлээд байгаа. Хятад, Унгар, Энэтхэг, Орос, Өмнөд Солонгос, Америк, Канад гээд дэлхийн түвшний том багууд оролцох юм байна. Харин эх орондоо зохион байгуулж байгаа давуу талаа ашиглан ОУШХ-ны холбогдох хүмүүстэй зөвшилцсөний үндсэн дээр манай улсаас 16 хүртэлх насны Дэлхийн шатрын Олимпиадын Сорилго тэмцээнээс шалгарч эрхээ авсан 10 баг тамирчин оролцохоор бэлтгэлдээ гарчээ. Монголын шатрын холбооноос баг тамирчидынхаа бэлтгэл сургуулилтанд анхаарал хандуулж ОХУ-ын дасгалжуулагч, Их мастер А.Фоминыхыг урьж ирүүлэн сургалт зохион байгуулсан байна.

Дэлхийн шатрын Олимпиадын үеэр “Mongolia open 2015” олон улсын нээлттэй тэмцээн зохион байгуулагдахаас гадна ОУШХ-ны шүүгч, дасгалжуулагчийн цол олгох семинарууд, сургуулийн шатрын багш нарт зориулсан тусгай үзүүлэх сургуулилтууд зэрэг арга хэмжээ болох юм.

Н.Нягт