Нийслэлийн удирдлагууд энэ сарын 1-ний өдрөөс Улаанбаатар смарт картгүй тохиолдолд 1000 төгрөгөөр зорчих шийдвэрийг гаргасан билээ. Энэхүү 3600 төгрөгийн үнэтэй Улаанбаатар смарт карт нь хүүхдийн, ахмад настан хөгжлийн бэрхшээлтэй иргэдийн, оюутны болон энгийн гэх төрлүүдтэй. Гэтэл өнөөдрийн байдлаар оюутнуудад зориулсан карт нь  тараагдаагүйгээс өндөр төлбөр төлж суралцахын хажуугаар нийтийн тээвэрт халаасны хэдэн төгрөгөө шавхах дээрээ хүрчээ.

Нийтийн тээвэрт нөхөн олговор олгох 2010 онд батлагдсан "Нийтийн тээврийн хэрэгслээр хичээлдээ зайлшгүй явах шаардлагатай сурагч, оюутныг тээвэрлэх журам"-аар оюутнууд үнэ төлбөргүй автобусаар зорчдог байсан юм. Тус журмын дагуу 2015-2016 оны хичээлийн жилд нийтийн тээврийн хэрэгслээр зорчих 113 мянган оюутны "Эрхийн үнэмлэх" буюу Төрийн банкны смарт картны захиалгыг цахим систем нэвтэрч байгаатай уялдуулан 2015 оны дөрөвдүгээр сарын 1-ний өдрөөс эхлэн  8900 төгрөгөөр авчээ.

Нийт 64000 оюутны смарт карт хэвлэгдэж, наймдугаар сарын 15-ны өдрөөс эхлэн тараагдах ёстой байсан ч өнөөдрийг хүртэл тэд гар дээрээ аваагүй байгаа тул нийтийн тээвэрт бэлэн мөнгөөр зорчиж буй оюутнуудыг төлөөлж Монголын оюутны холбооноос өчигдөр Нийслэлийн Засаг дарга Э.Бат-Үүлд шаардлага хүргүүлсэн юм.

Уг шаардлагын хариу ирээгүй тул яг одоо Монголын оюутны холбоо болон их дээд сургуулийн оюутнууд Чингисийн талбайд суулт зарлаад байна.

Энэ үеэр Монголын оюутны холбооны дэд ерөнхийлөгч Н.Санчирбаатар хэлэхдээ “Нийтийн тээврийн шинэчлэлтэй холбоотойгоор оюутнууд тайван суулт зарлаж байна. Улс орны эдийн  засаг хүнд байна. Их дээд сургуулийн төлбөр нэмэгдээд байгаа энэ хүнд үед нийтийн тээврийн асуудал бас нэгэн дарамт болж байна. Тиймээс хотын удирдлагууд шийдвэрүүдээ эргэн хараач ээ.

Нийтийн тээврээр зорчихтой холбоотой хотын дарга, нийслэлийн орлогч нар тодорхой хэмжээний буруутай шийдвэр гаргачихаад байна. Өнгөрсөн дөрөвдүгээр сарын 1-нээс л оюутнуудын хөнгөлөлттэй  зорчих асуудлыг эргэн шийдвэрлэнэ, нэгдсэн хариу өгнө гэж хойшлуулсаар байгаад өнөөдрийг хүрлээ. Есдүгээр сарын 1-нээс  оюутнууд ямар шугамаар яаж зорчих нь тодорхойгүй байсаар өнөөдөр 3 дахь өдөр нь болж байна. Нэг ёсондоо нийслэлийн удирдлагуудын шийдвэрээс болоод оюутнууд нэг талдаа 1000 төгрөгөөр зорчиж байна.

Өдөрт хоёр дамжиж байгаа нь 4000, гурав дамжиж байгаа нь 6000 төгрөгөөр дамжаад явбал оюутнууд яах вэ. Эд бол ажил хөдөлмөр хийдэг хүмүүс биш, нийгмийн оюунлаг хэсэг. Ирээдүйд ажил хөдөлмөр эрхлэх хүмүүс. Өнөөдөр эдгээр оюутнууд эрдэм мэдлэг олж авах төлбөрөө төлж суралцах хугацааны 3-4 жилд улсаас нийтийн тээврийн хөнгөлөлт, тэтгэлэг авч байгаа.  Тэд эргээд улсдаа 30-40 жил ажиллаж татвар төлөх сэхээтнүүд болно. Гэтэл алс ирээдүйг үл тоож, ирээдүй рүүгээ ус цацаж байгаад оюутны байгууллагууд  эсэргүүцлээ илдэрхийлж байна.

Бид шинэ юм хийж байгааг эсэргүүцээгүй, шинэ юм хүсээгүй. Зөвхөн оюутнуудад хуулиар олгогдсон эрхийнхээ дагуу нийтийн тээвэрт зорчих боломж олгооч гэдэг л асуудал байна. Оюутан хүн халаасандаа мөнгөгүй байж болох ч хичээлдээ үнэ төлбөргүй зорчдог байх боломж олгооч ээ. Шаардлагын хариу өнөөдөр 12,30 цагт ирэх ёстой байсан ч таг чимээгүй байна. Оюутнууд нийтийн тээврээр яаж зорчих нь тодорхой бус байгаа тул бид зайлшгүй суулт хийх хэмжээнд хүрлээ.

Өнөөдөр ямар нэгэн шийд авахгүйгээр оюутнуудаа гэртээ хариа гэж хэлэх боломж ч алга.  Шийдвэр гхарахыг хүлээнэ гэхээр хугацаагүй ажил болох гээд байна. Өнөөдрийн тайван жагсаалд 150 гаруй оюутан оролцож байна. Оюутнуудын тоо улам бүр нэмэгдэж илүү хүрээгээ тэлсэн ажил болохыг үгүйсгэх аргагүй. Иргэний нийгмийн байгууллагууд бусад холбоод нэгдэхээ илэрхийлээд байгаа. Тиймээс Нийслэлийн  удирдлагууд зөв зүйтэй шийдвэр гаргана гэж итгэж байна

П.Нарандэлгэр